आगीचे लोळ अन् किंकाळ्यांचे आवाज! काही क्षणाच बस जळून बेचिराख, उरला फक्त सांगाडा, घटनास्थळावरचे PHOTO

राजस्थानमधील जोधपूर-जैसलमेर महामार्गावर थईयात गावाजवळ मंगळवारी दुपारी ३:३० च्या सुमारास एक भीषण दुर्घटना घडली. जैसलमेरहून जोधपूरकडे जाणाऱ्या 'के के ट्रॅव्हल्स'च्या एसी स्लीपर बसला अचानक भीषण आग लागली. आगीच्या लपेट्या इतक्या भयानक होत्या की, या दुर्घटनेत २० हून अधिक प्रवाशांचा मृत्यू झाला आहे, तर १६ प्रवासी गंभीररित्या होरपळले आहेत.

मिळालेल्या माहितीनुसार, ही बस केवळ पाच दिवसांपूर्वीच या मार्गावर धावण्यासाठी सुरू करण्यात आली होती. एका सामान्य बसला बदलून तिचे एसी स्लीपरमध्ये रूपांतरण करण्यात आले होते. अपघातावेळी बसमध्ये लहान मुले आणि महिलांसह सुमारे ५७ प्रवासी प्रवास करत होते.

प्राथमिक तपासात असे दिसून आले आहे की, बसच्या मागील बाजूला शॉर्ट सर्किटमुळे आग लागली आणि ती एसी युनिटमध्ये पसरली. बसचे फायबर बॉडी आणि पडदे असल्यामुळे आगीचा भडका अधिक वेगाने वाढला. आगीच्या लपेट्या पाहून प्रवाशांनी आरडाओरड सुरू केली आणि अनेकांनी जीव वाचवण्यासाठी धावत्या बसमधून उड्या मारल्या. या दुर्घटनेची मुख्य भयावहता याचे कारण ठरले.

एसी स्लीपर बसला केवळ पुढच्या बाजूला एकच गेट होते आणि आग लागताच वायरिंग जळाल्याने हे गेट आपोआप लॉक झाले. स्लीपर बसमधील अरुंद गॅलरी आणि इमर्जन्सी एक्झिट नसणे यामुळे आत अडकलेल्या प्रवाशांना बाहेर पडण्याची संधीच मिळाली नाही. अनेकांनी खिडक्यांचे मजबूत काच तोडण्याचा प्रयत्न केला, पण ते यशस्वी झाले नाहीत आणि ते आतच अडकून जिवंतपणीच होरपळले.

घटनास्थळ जैसलमेर मुख्यालयापासून सुमारे १० ते १२ किलोमीटर दूर होते. रस्त्याच्या कडेला असलेल्या स्थानिक नागरिकांनी सर्वात आधी धूर आणि आग पाहून बचावकार्य सुरू केले. त्यांनी लगेच जवळच्या आर्मी (Army) कॅम्पशी संपर्क साधला, त्यानंतर सेनेचे जवान जेसीबी घेऊन तातडीने घटनास्थळी दाखल झाले.

जवान आणि स्थानिकांनी जेसीबीच्या मदतीने बसचा गेट तोडून आत अडकलेल्या प्रवाशांना बाहेर काढले. जैसलमेरहून अग्निशमन दल (Fire Brigade) येण्यास सुमारे ४५ मिनिटांचा उशीर झाला, तोपर्यंत बस पूर्णपणे जळून खाक झाली होती.

सर्व जखमींना जैसलमेरच्या जवाहर हॉस्पिटलमध्ये प्राथमिक उपचारानंतर पुढील उपचारांसाठी जोधपूरच्या महात्मा गांधी हॉस्पिटल (MGH) आणि एमडीएम हॉस्पिटलमध्ये हलवण्यात आले आहे. या हृदयद्रावक अपघाताची माहिती मिळताच मुख्यमंत्री भजनलाल शर्मा यांनी खोल शोक व्यक्त केला आणि ते विशेष विमानाने जयपूरहून जैसलमेरला पोहोचले.

त्यांनी दुर्घटनाग्रस्त बसची पाहणी केली आणि आर्मीचे अधिकारी तसेच स्थानिक नागरिकांचे तातडीने मदत केल्याबद्दल आभार मानले. यानंतर मुख्यमंत्री जोधपूरला पोहोचले आणि त्यांनी महात्मा गांधी हॉस्पिटलच्या बर्न युनिटमध्ये दाखल असलेल्या जखमींची भेट घेतली व त्यांच्या कुटुंबीयांचे सांत्वन केले.

मुख्यमंत्र्यांनी डॉक्टरांना प्रत्येक रुग्णाचे उपचार, जळाल्याचे प्रमाण आणि आवश्यक साधनसामग्रीची माहिती घेतली. त्यांनी निर्देश दिले की, प्रत्येक रुग्णासाठी विशेष डॉक्टर आणि नर्सची टीम (Dedicated Team) २४ तास देखरेखीसाठी तैनात करावी. दुःखच्या या काळात राज्य सरकार पीडित कुटुंबांच्या सोबत आहे, असे आश्वासन त्यांनी दिले.