Weather update : देशभरात कडाक्याची थंडी; महाराष्ट्रही गारठला, जाणून घ्या काय आहे आजचा हवामान अंदाज ?

नवी दिल्ली, 26 डिसेंबर : उत्तर प्रदेश -बिहार, दिल्ली एनसीआर, पंजाब आणि हरियाणामध्ये थंडीची लाट आल्याचं पाहायला मिळत आहे. तर दुसरीकडे जम्मू-काश्मीरमध्ये सध्या जोरदार बर्फवृष्टी सुरू आहे. पर्वतीय प्रदेशात बर्फ पडत असल्यामुळे मैदानी राज्यातील तापमानात मोठी घसरण झाली आहे.

पंजाब, हरियाणा, दिल्ली आणि उत्तर प्रदेशमध्ये दाट दुके पडण्याचा इशारा हवामान विभागाकडून देण्यात आला आहे. पुढील दोन ते तीन दिवस असंच वातावरण राहणार असल्याचं आयएमडीनं म्हटलं आहे.

दरम्यान दुसरीकडे 29 आणी 30 डिसेंबरला उज्जैन, ग्वालियार आणि चंबलच्या प्रदेशामध्ये हवामानविभागाकडून हलक्या पावसाची शक्यता वर्तवण्यात आली आहे. तर दुसरीकडे या काळात जम्मू -काश्मीर आणि हिमाचल प्रदेशात जोरदार बर्फवृष्टी होण्याची शक्यता असल्याचं हवामान विभागानं म्हटलं आहे.

स्कायमेटने वर्तवलेल्या अंदानुसार आज देशभरात कोरडं वातावरण राहणार असून, किमान आणि कमाल तापमानात घसरण होण्याची शक्यता आहे. त्यामुळे थंडी वाढणार आहे. तर दुसरीकडे अरुणाचल प्रदेशच्या काही भागांत आज हलका ते मध्यम स्वरुपाच्या पावसाचा अंदाज वर्तवण्यात आला आहे.

महाराष्ट्राबाबत बोलायचे झाल्यास आज राज्याच्या बहुतांश भागात वातावरण कोरडलं राहणार असून, गारठा आणखी वाढण्याची शक्यता आहे.