Weather Alert: पुणे ते कोल्हापूर पावसाचा जोर, आज पुन्हा ऑरेंज अलर्ट, 22 जुलैचा हवामान अंदाज

आषाढ महिना संपून लवकरच श्रावण सुरू होत आहे. त्यामुळे राज्यात आता श्रावण सरींचे वेध लागले आहेत. पश्चिम महाराष्ट्रातील पावसाची तीव्रता कमी झाली असून घाटभागात मात्र जोरदार पाऊस सुरू आहे. आज 22 जुलै रोजीचा पश्चिम महाराष्ट्रातील जिल्हानिहाय हवामान अंदाज जाणून घेऊ.

पुढील 24 तासात पुणे आणि पुणे घाटमाथ्यावर जोरदार पावसाची शक्यता असल्याने हवामान विभागाने सतर्कतेचा यलो अलर्ट दिला आहे. तसेच पुढील 24 तासात पुण्यातील कमाल तापमान 30 तर किमान तापमान 22 अंश सेल्सिअस इतके राहील.

सातारा जिल्ह्यात गेल्या 24 तासात हलका पाऊस झाला. सातारा परिसरामध्ये 0.4 मिलिमीटर पावसाची नोंद झाली. पुढील 24 तासात साताऱ्यातील कमाल तापमान 30 अंश सेल्सिअस राहील. घाटमाथ्यावर मुसळधार पावसाची शक्यता असल्याने दक्षतेचा ऑरेंज अलर्ट जारी केला आहे.

कोल्हापूर जिल्ह्यात मागील 24 तासात 2 मिलीमीटर पावसाची नोंद झाली. यावेळी कमाल तापमान 28.6 अंश सेल्सिअस राहिले. पुढील 24 तासात कमाल तापमान 28 अंशावर पोहचेल. तसेच कोल्हापूर घाटमाथ्यावर मुसळधार पावसाची शक्यता असल्याने दक्षतेचा ऑरेंज अलर्ट देण्यात आला आहे.

सोलापूर जिल्हात मागील 24 तासात पावसाची उघडीप राहिली. कमाल तापमानात वाढ होऊन पारा 34.4 अंशावर पोहचला आहे. पुढील 24 तासात कमाल तापमानाचा पारा 33 अंशावर राहण्याची शक्यता आहे. तसेच सोलापूर जिल्ह्यात हलक्या पावसाची शक्यता कायम आहे.

सांगली जिल्ह्यामध्ये गेल्या 24 तासांत हलक्या पावसाची नोंद झाली. आज जिल्ह्यात विजांसह पावसाची शक्यता असल्याने यलो अलर्ट देण्यात आला आहे. यावेळी जिल्ह्यातील कमाल तापमान 32 तर किमान तापमान 23 अंश सेल्सिअस इतके राहील.

दरम्यान, पुढील काही दिवस हवामानाची हीच स्थिती कायम राहणार आहे. पश्चिम महाराष्ट्रातील पावसाचा तीव्रता कमी होणार असून घाटभागात मात्र जोर कायम राहील. त्यामुळे नागरिकांना योग्य ती काळजी घ्यावी लागेल.