Weather Alert: सोसाट्याचा वारा, विजांचा कडकडाट अन् मुसळधार पाऊस, रविवारी पश्चिम महाराष्ट्राला अलर्ट

राज्यात उन्हाचा चटका आणि उकाडा तापदायक ठरत असतानाच, पावसाच्या हजेरीने काहीसा थंडावा मिळाला आहे. आज 10 ऑगस्ट रोजी पश्चिम महाराष्ट्र, मराठवाडा आणि पूर्व विदर्भात विजांसह पावसाची शक्यता असल्याने सतर्कतेचा इशारा आहे. उर्वरित राज्यात आकाश ढगाळ राहून विजांसह हलक्या सरींचा अंदाज हवामान विभागाने वर्तविला आहे.

पुणे जिल्ह्यात शिवाजीनगर परिसरात मागील 24 तासात 1.2 मिलिमीटर पावसाची नोंद झाली. तसेच कमाल तापमानाचा पारा 29.2 अंश सेल्सिअसवर राहिला. पुढील 24 तासात संपूर्ण पुणे जिल्ह्यात विजांसह हलक्या पावसाची शक्‍यता आहे. यावेळी कमाल तापमान 30 तर किमान तापमान 22 अंश सेल्सिअस इतके राहील.

सातारा जिल्ह्यात मागील 24 तासात 1 मिलिमीटर पावसाची नोंद झाली. पुढील 24 तासात साताऱ्यातील कमाल तापमान 30.6 अंश सेल्सिअस राहिल. तसेच पुढील 24 तासांसाठी सातारा जिल्ह्यात सतर्कतेचा येलो अलर्ट भारतीय हवामान विभागाने दिला आहे. यावेळी विजांच्या कडकडाटात हलक्या पावसाची शक्यता आहे.

कोल्हापूर जिल्ह्यात मागील 24 तासात 0.7 मिलीमीटर पावसाची नोंद झाली. यावेळी कमाल तापमान 27.6 अंश सेल्सिअस राहिले. पुढील 24 तासात कमाल तापमान 27 अंशावर राहिल. जिल्ह्यात विजांच्या कडकडाटासह ताशी 30 ते 40 किलोमीटर जोरदार वारे आणि मध्यम पावसाची शक्यता आहे. पुढील 24 तास कोल्हापूर जिल्हास सतर्कतेचा अलर्ट आयएमडीने जारी केला आहे.

सोलापूर जिल्हात मागील 24 तासात पावसाची उघडीप राहिली. तसेच 29.5 अंश सेल्सिअस कमाल तापमानाची नोंद झाली. पुढील 24 तासात कमाल तापमान 29 अंशावर राहिल. तसेच पुढील 24 तासात सोलापूर जिल्ह्यात विजांसह पावसाची शक्यता असल्याने सतर्कतेचा यलो अलर्ट वर्तवण्यात आला आहे.

मागील 24 तासात सांगली जिल्ह्यामध्ये 2 मिलीमीटर पावसाची नोंद झाली. पुढील 24 तासात विजांचा कडकडाटासह ताशी 30 ते 40 किलोमीटर जोरदार वारे आणि मध्यम पावसाची शक्यता आहे. यावेळी जिल्ह्यातील कमाल तापमान 29 तर कमान तापमान 21 अंश सेल्सिअस इतके राहील.

पश्चिम महाराष्ट्रातील काही जिल्ह्यांत पावसाच्या उघडिपीसह तापमानात चढ-उतार सुरू आहे. तसेच काही जिल्ह्यांमध्ये पावसाला पुन्हा सुरुवात झाली आहे. पश्चिम महाराष्ट्रातील सातारा, सांगली, कोल्हापूर जिल्ह्यांना सतर्कतेचा इशारा असल्याने नागरिकांनी योग्य ती दक्षता घ्यावी.