Weather Alert : महाराष्ट्रात आता धडकणार सुपर कोल्ड लाट, हवामान खात्याकडून अलर्ट

डिसेंबरच्या दुसऱ्या आठवड्यात राज्यात थंडीचा कडाका चांगलाच वाढलाय. राज्यातील धुळे जिल्ह्यांत सर्वात कमी 5 अंश सेल्सिअस तापमानाची नोंद झाली. तर विदर्भातील तापमानही 9 अंश सेल्सिअस पर्यंत खाली आलंय.

9 डिसेंबर रोजीही विदर्भात थंडीची लाट कायम आहे. 10 डिसेंबरपासून उत्तर महाराष्ट्र, पश्चिम महाराष्ट्र आणि मराठवाड्यात थंडीचा जोर आणखी वाढणार असल्याची माहिती हवामान विभागानं दिली आहे. पाहुयात, 9 डिसेंबर रोजी राज्यातील तापमान आणि हवामानाची स्थिती कशी राहील.

मुंबईतील तापमानात देखील आता घट होताना दिसून येत आहे. तेथील कमाल तापमान 33 अंश सेल्सिअस तर किमान तापमान 16 अंश सेल्सिअस इतकं असू शकतं. मुंबईत 9 डिसेंबर रोजी निरभ्र आकाश राहण्याची शक्यता आहे. तसेच कोकण विभागातही आता तापमानाचा पारा काहीसा खाली आलाय.

पश्चिम महाराष्ट्रातही गारठा कायम आहे. पश्चिम महाराष्ट्रातील प्रमुख शहर असलेल्या पुणे शहरात कमाल तापमान 27 अंश सेल्सिअस तर किमान तापमान 11 अंश सेल्सिअस इतकं असू शकतं. पुण्यात मुख्यतः निरभ्र आकाश राहण्याची शक्यता आहे. पुढील काही दिवसांत पश्चिम महाराष्ट्रात थंडीच्या लाटेची शक्यता वर्तवण्यात आली आहे.

मराठवाड्यातही हुडहुडी कायम असून पुढील काही दिवसांत तापमानात आणखी घट होण्याची शक्यता आहे. छत्रपती संभाजीनगरमधील कमाल तापमान 28 अंश सेल्सिअस तर किमान तापमान 9 अंश सेल्सिअस इतकं असू शकतं. त्याठिकाणी 9 डिसेंबर रोजी निरभ्र आकाश राहून वातावरण कोरडे राहण्याची शक्यता आहे.

उत्तर महाराष्ट्रातील तापमानात सर्वाधिक घट बघायला मिळत आहे. उत्तर महाराष्ट्रातील प्रमुख शहर असलेल्या नाशिकमध्ये कमाल तापमान 28 अंश सेल्सिअस तर किमान तापमान 10 अंश सेल्सिअस इतकं असू शकतं. त्याठिकाणी निरभ्र आकाश राहून वातावरण कोरडे राहण्याची शक्यता आहे. तसेच 10 डिसेंबरपासून उत्तर महाराष्ट्रात थंडी सक्रिय होण्याची शक्यता आहे.

गेल्या काही दिवसांत विदर्भात थंडीची लाट बघायला मिळत आहे. विदर्भातील गोंदिया, नागपूर आणि वर्धा या तीन जिल्ह्यांत शीत लहरींचा इशारा देण्यात आला असून यलो अलर्ट जारी करण्यात आला आहे. विदर्भातील प्रमुख शहर असलेल्या नागपूरमधील कमाल तापमान 29 अंश सेल्सिअस तर किमान तापमान 9 अंश सेल्सिअस इतकं असू शकतं. त्याचबरोबर विदर्भातील इतरही जिल्ह्यांत तापमानात घट बघायला मिळत आहे.