Weather Alert: पुढील 24 तास धोक्याचे, राज्यात मुसळधार पाऊस, 10 जिल्ह्यांना ऑरेंज अलर्ट

राज्यामध्ये 16 ऑगस्ट ते 21 ऑगस्ट दरम्यान विविध ठिकाणी मुसळधार पावसाची शक्यता भारतीय हवामानशास्त्र विभागाच्या मुंबई येथील कुलाबा वेधशाळेने वर्तवली आहे. तर कोकणातील काही ठिकाणी मुसळधार ते अति मुसळधार तर तुरळक ठिकाणी अति मुसळधार पावसाची शक्यता आहे.

मध्य महाराष्ट्राच्या अंतर्गत भागांमध्ये तसेच मराठवाड्यामध्ये काही ठिकाणी मुसळधार ते अति मुसळधार पावसाची शक्यता देखील हवामान विभागाने वर्तवली. पाहुयात 17 ऑगस्ट रोजी राज्यामध्ये हवामानाची स्थिती कशी असेल.

मुंबई शहर आणि उपनगरामध्ये पुढील 24 तासांमध्ये मुसळधार ते अति मुसळधार पावसाची शक्यता आहे. कोकणातील सर्व जिल्ह्यांना हवामान विभागाने 17 ऑगस्टसाठी ऑरेंज अलर्ट जारी केला आहे.

पुण्याच्या घाट परिसरात अतिमुसळधार पावसाचा इशारा देण्यात आला आहे. तर सातारा आणि कोल्हापूरच्या घाट परिसरात देखील मुसळधार पावसाची शक्यता आहे. पुणे, सातारा, सांगली, सोलापूरमध्ये हलक्या ते मध्यम पावसाची शक्यता आहे.

उत्तर महाराष्ट्रात नाशिकच्या घाट भागात मुसळधार तर नाशिक जिल्ह्यात जोरदार पावसाची शक्यता आहे. जळगाव आणि नाशिकला यलो अलर्ट देण्यात आला आहे.

तर मराठवाड्यात छत्रपती संभाजीनगर, जालना, परभणी, हिंगोली आणि नांदेड जिल्ह्यात तुरळक ठिकाणी मुसळधार पावसाची शक्यता आहे. या पाचही जिल्ह्यांना यलो अलर्ट देण्यात आला आहे.

तर विदर्भात सर्व जिल्ह्यांना यलो अलर्ट जारी करण्यात आला आहे. तर यवतमाळ, चंद्रपूर आणि गडचिरोली या तीन जिल्ह्यांना ऑरेंज अलर्ट देण्यात आला आहे. त्यामुळे पूर्व विदर्भात देखील मुसळधार पावसाची शक्यता वर्तवण्यात आली आहे.