Pune News : पुण्यात 40 पीएमपीएमल प्रवाशांचा जीव वाचला, भलं मोठं झाड कोसळलं पण नेमकी चूक कुणाची?

सकाळी 10 वाजण्याच्या सुमारास पिंपरी-चिंचवडमध्ये एक धक्कादायक घटना घडली, जिथे निगडीच्या दिशेने निघालेल्या पीएमपीएल बसवर अचानक एक भलेमोठे झाड कोसळले.

अपघातग्रस्त बसमध्ये सुमारे 40 प्रवासी होते, मात्र सुदैवाने या घटनेत कोणतीही जीवितहानी झाली नाही आणि कोणीही जखमी झाले नाही, त्यामुळे मोठी दुर्घटना टळल्याचे म्हटले जात आहे.

मिळालेल्या माहितीनुसार, रस्त्याच्या शेजारी केबल टाकण्याचे काम सुरू होते. या कामासाठी झाडाच्या भोवती खोदकाम करण्यात आले होते, ज्यामुळे झाडाच्या मुळ्या सैल झाल्या होत्या.

याच कारणामुळे, रस्त्यावर भरधाव वेगाने धावत असलेल्या पीएमपीएल बसवर ते झाड अचानक कोसळले. झाड कोसळल्याने बसचे काही प्रमाणात नुकसान झाले.

घटनेची माहिती मिळताच अग्निशमन दलाचे जवान तात्काळ घटनास्थळी दाखल झाले. त्यांनी तातडीने बचावकार्य हाती घेत बसमधील सर्व ४० प्रवाशांना सुखरूप बाहेर काढले.

बसवर अचानक झाड पडल्यानं घटनेमुळे काही काळ रस्त्यावर वाहतूक कोंडी झाली होती, ज्यामुळे वाहनचालकांना अडथळ्यांचा सामना करावा लागला. अग्निशमन दलाच्या जवानांनी काही वेळातच वाहतूक पुन्हा सुरळीत केली.

दरम्यान, ऐनवेळी मिळालेल्या मदतीमुळे आणि प्रवाशांच्या नशिबाने, या घटनेत कोणतीही गंभीर हानी झाली नाही, ज्यामुळे सर्वांनी सुटकेचा निश्वास टाकला.