Weather Alert: छत्री सोबतच ठेवा, आज कधीही भिजवू शकतो पाऊस, पुणे ते कोल्हापूर हवामान अंदाज

पूर्व विदर्भात दमदार हजेरी लावल्यानतर राज्यात पावसाचा जोर ओसरला आहे. आज 12 जुलै रोजी विदर्भ, मराठवाड्यात तुरळक ठिकाणी विजांसह पावसाची शक्यता असून सतर्कतेचा यलो अलर्ट हवामान विभागाने दिला आहे. पश्चिम महाराष्ट्रात उघडिपीसह हलक्या सरींची शक्यता आहे.

पुणे जिल्ह्यातील शुक्रवारी पावसाची रिपरिप राहिली. तर घाटमाथ्यावरील पावसाचा जोर कमी आहे. मागील 24 तासात पुण्याच्या शिवाजीनगर परिसरात 0.1 मिलिमीटर पावसाची नोंद झाली. यावेळी कमाल तापमान 29.8 अंश सेल्सिअस राहिले. पुढील 24 तासात पुण्यातील कमाल तापमान 30 अंशावर राहिल. हलक्या पावसाचा अंदाज हवामान विभागाने व्यक्त केला आहे.

सातारा जिल्ह्यात पावसाचा जोर ओसरला आहे.मागील 24 तासात सातारा परिसरामध्ये 0.2 मिलिमीटर पावसाची नोंद झाली. धरण क्षेत्रामध्ये मागील काही दिवसांपासून सुरू असलेला पावसाचा जोर ओसरला आहे. पुढील 24 तासात साताऱ्यातील कमाल तापमान 30 अंश सेल्सिअस राहिल. सातारा जिल्ह्यामध्ये ढगाळ आकाशासह हलक्या पावसाची शक्यता हवामान विभागाने वर्तवली आहे.

गेल्या 24 तासात कोल्हापूर परिसरामध्ये 0. 1 मिलीमीटर पाऊस नोंदविण्यात आला. यावेळी कमाल तापमानात वाढ नोंदविण्यात आली. कमाल तापमान 28.1 अंश सेल्सिअस राहिले. पुढील 24 तासात कमाल तापमान 28 अंशावर राहिल. तसेच पुढील 24 तासात पावसाचा जोर कमी राहून हलक्या पावसाचा अंदाज हवामान विभागाने व्यक्त केला आहे.

सोलापूर जिल्हात 13 मिलिमीटर पाऊस नोंदविण्यात आला. जिल्ह्यातील कमाल तापमानात वाढ होत आहे. मागील 24 तासात 33.6 अंश सेल्सियस तापमानाची नोंद सोलापूरमध्ये झाली. पुढील 24 तासात कमाल तापमानाचा पारा 33 अंशावर राहण्याची शक्यता असून तुरळक ठिकाणी हलक्या पावसाची शक्यता आहे.

सांगली जिल्ह्यात शुक्रवारी 0.2 मिलिमीटर पावसाची नोंद झाली. पुढील 24 तासात सांगली जिल्ह्यात ढगाळ आकाशासह हलक्या पावसाचा अंदाज आहे. यावेळी जिल्ह्यातील कमाल तापमान 22 तर किमान तापमान 31 अंश सेल्सिअस इतके राहील.

मागील दोन महिन्यांपासून असणाऱ्या सततच्या पावसाने पिकांची वाढ खुंटून शेती संकटात आली आहे. मागील 48 तासांपासून पश्चिम महाराष्ट्रात असणाऱ्या पावसाच्या उघडीपीमूळे शेतकऱ्यांना पीक वाढीची आशा आहे. पुढील काही दिवस हवामानाची हीच स्थिती कायम राहणार असून कोणताही सतर्कतेचा अलर्ट नाही.