आजचं हवामान: पश्चिम महाराष्ट्रात धो धो कोसळणार, 24 तासांसाठी अलर्ट; पुणे, कोल्हापुरात काय स्थिती?

कोकण, घाटमाथ्यावर पाऊस कोसळत असला तरी राज्याच्या अंतर्गत भागात मात्र पावसाने उघडीप दिली आहे. आज 24 जून रोजी कोकण, घाटमाथा आणि विदर्भात जोरदार पावसाची शक्यता आहे. पश्चिम महाराष्ट्रातील सर्वच जिल्ह्यांत रिमझिम पाऊस आहे. पुणे, सातारा आणि कोल्हापूर घाटमाथ्यावर मात्र जोरदार पावसाची शक्यता असल्याने सतर्कतेचा इशारा देण्यात आला आहे.

मागील 24 तासांमध्ये सातारा शहरात 7.3 मिलीमीटर पाऊस नोंदविण्यात आला. यावेळी कमाल तापमान 27.1 अंश सेल्सिअस राहिले. आज कमाल तापमान 29 अंशावर राहील. ढगाळ आकाशासह हलक्या पावसाचा अंदाज भारतीय हवामान विभागाने वर्तवला आहे. सातारा जिल्ह्याच्या घाटमाथ्यावर जोरदार पावसाची शक्यता असल्याने सतर्कतेचा येलो अलर्ट देण्यात आला आहे.

पुणे जिल्ह्यामध्ये पावसाची संततधार कमी झाली आहे. मागील 24 तासात शिवाजीनगर परिसरात 0.6 मिलीमीटर पावसाची नोंद झाली. तसेच 28.9 अंश सेल्सिअस कमाल तापमान राहिले. पुणे जिल्ह्याच्या घाटमाथ्यावर जोरदार पावसाची शक्यता असल्याने सतर्कतेचा यलो अलर्ट हवामान विभागाने दिला आहे.

कोल्हापूर परिसरात सोमवारी 12 मिलीमीटर पावसाची नोंद झाली. पुढील 24 तासात कमाल तापमान 28 अंश सेल्सिअस तर किमान तापमान 22 अंश सेल्सिअस वर असेल. हलक्या पावसासह आकाश साधारणपणे ढगाळ राहील.

सोलापूर जिल्ह्यातील कमाल तापमानात वाढ झाली असून मागील 24 तासात पारा 33.3 अंशावर राहिला. पुढील 24 तासात गडगडाटी पावसाची शक्यता आहे. यावेळी पारा 34 अंशांवर जाण्याचा अंदाज आहे.

सांगली जिल्ह्यात गेल्या 24 तासांत 2.1 मिलिमीटर पावसाची नोंद झाली. आज जिल्ह्यात हलक्या पावसाचा अंदाज आहे. यावेळी जिल्ह्यातील कमाल तापमान 30 तर किमान तापमान 23 अंश सेल्सिअस इतके राहील.

राज्यातील हवामानात सातत्याने बदल होत आहेत. कोकण आणि घाटमाथा भागात पावसाचा जोर कायम आहे. पश्चिम महाराष्ट्रात पावसाची तीव्रता कमी झाली असली तरी अधूनमधून हलका ते मध्यम पाऊस हजेरी लावत आहे. पुढील काही दिवस हवामानाची हीच स्थिती कायम राहण्याची शक्यता आहे. त्यामुळे नागरिकांनी योग्य ती काळजी घ्यावी.