T20 World Cup : ऑस्ट्रेलिया IN का Out... पॉईंट्स टेबल उलटं फिरलं, 24 तासात कांगारूंचा फैसला होणार!

पथुम निसांकाने केलेल्या वादळी शतकाच्या जोरावर श्रीलंकेने ऑस्ट्रेलियाला 8 विकेटने धूळ चारली आहे. याआधी ऑस्ट्रेलियाचा झिम्बाब्वेविरुद्ध 23 रननी पराभव झाला होता.

ऑस्ट्रेलियाविरुद्धच्या या विजयासह श्रीलंकेने ग्रुप स्टेजमध्ये 3 पैकी 3 सामने जिंकत सुपर-8 मध्ये प्रवेश केला आहे. ग्रुप बी मधून श्रीलंकेशिवाय आणखी एकच टीम प्रवेश करू शकते, ज्यात ऑस्ट्रेलिया, झिम्बाब्वे आणि आयर्लंड यांच्यात स्पर्धा आहे.

झिम्बाब्वेने 2 पैकी 2 सामन्यांमध्ये विजय मिळवला आहे, त्यामुळे ते पॉईंट्स टेबलमध्ये 4 अंकांसह दुसऱ्या क्रमांकावर आहेत. 3 सामन्यात 1 विजय आणि 2 पराभवांसह ऑस्ट्रेलिया तिसऱ्या आणि आयर्लंडही तितक्याच पॉईंट्ससह चौथ्या क्रमांकावर आहे.

ऑस्ट्रेलिया सुपर-8 मध्ये प्रवेश करणार का नाही? आता 24 तासात ठरणार आहे. मंगळवारी झिम्बाब्वे आणि आयर्लंड यांच्यात दुपारी 3 वाजता सामना सुरू होईल, या सामन्यात झिम्बाब्वेचा विजय झाला तर ऑस्ट्रेलियाचं आव्हान संपुष्टात येईल.

दुसरीकडे झिम्बाब्वेचा आयर्लंड आणि श्रीलंकेविरुद्ध पराभव झाला तर ऑस्ट्रेलियाला ओमानविरुद्धच्या सामन्यात मोठा विजय मिळवावा लागेल, तर ऑस्ट्रेलियाचा नेट रनरेट हा झिम्बाब्वेपेक्षा चांगला होईल आणि कांगारू 4 पॉईंट्ससह सुपर-8 मध्ये प्रवेश करतील.

झिम्बाब्वेचा नेट रनरेट हा सध्या +1.984 इतका आहे, तर ऑस्ट्रेलियाचा नेट रनरेट +1.100 एवढा आहे. झिम्बाब्वे दोन्ही मॅच हरली आणि ऑस्ट्रेलियाने ओमानचा पराभव केला तर ऑस्ट्रेलिया, झिम्बाब्वे आणि आयर्लंड यांचे प्रत्येकी 4-4 पॉईंट्स होतील, अशा वेळी ज्या टीमचा नेट रनरेट चांगला असेल ती टीम सुपर-8 मध्ये जाईल.