Team India : विश्वास ठेवला त्यानेच धोका दिला, T20 वर्ल्ड कपआधी टीम इंडियाचा हुकमी एक्का उघडा पडला!

न्यूझीलंडविरुद्धच्या वनडे सीरिजमध्ये टीम इंडियाचा धक्कादायक पराभव झाला आहे. या पराभवानंतर पुन्हा एकदा भारतीय टीम मॅनेजमेंट आणि खेळाडूंच्या कामगिरीवर प्रश्नचिन्ह उपस्थित झालं आहे, खासकरून ज्यांची टी-20 वर्ल्ड कपसाठीच्या टीममध्ये निवड झाली आहे.

न्यूझीलंडने 3 वनडे मॅचच्या या सीरिजमध्ये दिग्गजांनी भरलेल्या टीम इंडियाला जबर धक्का दिला. सीरिजचा पहिला सामना गमावल्यानंतर किवी टीमने लागोपाठ 2 सामने जिंकले. भारतीय भूमीवर न्यूझीलंडला पहिल्यांदाच वनडे सीरिज जिंकता आली आहे. इंदूरमधल्या शेवटच्या वनडेमध्ये न्यूझीलंडचा 41 रननी विजय झाला, याचसोबत त्यांनी सीरिज 2-1 ने जिंकली.

या पराभवानंतर भारतीय टीम मॅनेजमेंट आणि खेळाडूंच्या कामगिरीवर प्रश्नचिन्ह उपस्थित होत आहे. टी-20 वर्ल्ड कपसाठीही याच टीममधले काही खेळाडू खेळणार असल्यामुळेही टेन्शन वाढलं आहे.

न्यूझीलंडविरुद्धच्या वनडे सीरिजमध्ये बुमराहला विश्रांती देण्यात आली, त्यामुळे सगळ्यात अनुभवी असलेल्या कुलदीप यादववर सर्वाधिक जबाबदारी होती. पण 3 सामन्यांमध्ये कुलदीपला फक्त 3 विकेटच घेता आल्या, तसंच त्याने रनही बऱ्याच दिल्या. डॅरेल मिचेलने त्याच्या पहिल्याच बॉलवर सरळ सिक्स मारला आणि कुलदीपच्या आत्मविश्वासाला धक्का दिला, त्यानंतर कुलदीपने बचावात्मक बॉलिंग केली.

मिचेल आणि ग्लेन फिलिप्सने डेथ ओव्हर्समध्येही कुलदीपवर हल्ला चढवला. इंदूरच्या मैदानात कुलदीपच्या बॉलिंगवर मिचेल आणि फिलिप्सने अगदी सहज कुलदीपचे बॉल बाऊंड्री लाईनबाहेर टोलवले. कुलदीपने 6 ओव्हरमध्ये 48 रन दिल्या, ज्यात त्याला 1 विकेट मिळाली. संपूर्ण सीरिजमध्ये कुलदीपचा इकोनॉमी रेट 7.28 एवढा होता.

न्यूझीलंडच्या डॅरेल मिचेलने मात्र कुलदीप यादवचं कौतुक केलं आहे. कुलदीप जागतिक दर्जाचा बॉलर आहे, त्याच्या चांगल्या दिवशी तो एकहाती मॅच फिरवू शकतो, असं मिचेल म्हणाला आहे. कुलदीप यादव हा टी-20 वर्ल्ड कपमधला टीम इंडियाचा हुकमी एक्का आहे, त्यामुळे त्याचं फॉर्ममध्ये परतणं टीम इंडियासाठी गरजेचं आहे.

टी-20 वर्ल्ड कप हा भारतात होणार आहे, जिथे स्पिन बॉलर महत्त्वाची भूमिका बजावतील. भारतीय टीममध्ये वरुण चक्रवर्ती, कुलदीप यादव हे दोनच स्पेशलिस्ट स्पिनर आहेत. तर अक्षर पटेल आणि वॉशिंग्टन सुंदर हे स्पिन बॉलिंग ऑलराऊंडर आहेत, पण वॉशिंग्टन सुंदर वर्ल्ड कपपर्यंत फिट होणार का नाही? याबाबत सस्पेन्स कायम आहे.