WhatsApp यूझर्ससाठी सिक्योरिटी वॉर्निंग जारी! एका चुकीमुळे होऊ शकतं मोठं नुकसान

नवी दिल्ली : या आठवड्यात, भारत सरकारने व्हॉट्सअ‍ॅप डेस्कटॉप यूझर्सना 'उच्च-सुरक्षा' चेतावणी जारी केली आहे. 9 एप्रिल रोजी, माहिती आणि प्रसारण मंत्रालयाच्या अंतर्गत येणाऱ्या इंडियन कॉम्प्युटर इमर्जन्सी रिस्पॉन्स टीम (CERT-IN) ने त्यांच्या पीसीवर डेस्कटॉप अ‍ॅप इन्स्टॉल केलेल्या व्हॉट्सअ‍ॅप यूझर्सना 'उच्च-सुरक्षा' चेतावणी जारी केली.

सरकारला WhatsAppमध्ये काही सुरक्षा त्रुटी आढळून आल्या आहेत. ज्याचा फायदा घेऊन हॅकर्स तुमचा पर्सनल डेटा चोरू शकतात. या त्रुटींमुळे तुमचे अकाउंट हॅक देखील होऊ शकते. सरकारने यूझर्सना त्यांचे व्हॉट्सअ‍ॅप तात्काळ अपडेट करण्याचा सल्ला दिला आहे.

नवीन अपडेटमध्ये या त्रुटी दूर करण्यात आल्या आहेत. याशिवाय, यूझर्सना कोणत्याही संशयास्पद लिंकवर क्लिक करणे टाळण्याचा सल्ला देण्यात आला आहे. जर एखाद्या अनोळखी व्यक्तीने तुम्हाला मेसेज पाठवला तर त्याकडे दुर्लक्ष करा आणि तो ताबडतोब ब्लॉक करा.

या सुरक्षा अलर्टचा सर्वात मोठा निष्कर्ष असा आहे की, जर हॅकर्सनी या त्रुटींचा फायदा घेतला तर व्हॉट्सअ‍ॅप यूझर्सना स्पूफिंग हल्ल्यांना सामोरे जावे लागू शकते. CERT-In नोटमध्ये म्हटले आहे की, 'ही त्रुटी MIME टाइप आणि फाइल एक्सटेंशनमधील चुकीच्या कॉन्फिगरेशनमुळे उद्भवते. ज्यामुळे अटॅचमेंट उघडण्यात अडचण येते. सायबर अटॅकर या त्रुटीचा फायदा घेऊन एक हानिकारक अटॅचमेंट तयार करू शकतो जो WhatsApp मध्ये मॅन्युअली उघडल्यावर अनियंत्रित कोड चालवू शकतो.'

हा सुरक्षा धोका प्रामुख्याने विंडोज पीसीवर व्हॉट्सअ‍ॅप डेस्कटॉप अ‍ॅप वापरणाऱ्या यूझर्सशी संबंधित आहे. एजन्सीचे म्हणणे आहे की 2.2450.6 च्या आधीच्या विंडोजसाठी व्हॉट्सअ‍ॅप डेस्कटॉपच्या व्हर्जन या बनावट हल्ल्यांना बळी पडतात. हे टाळण्यासाठी, तुमचे व्हॉट्सअ‍ॅप ताबडतोब अपडेट करा.