Snake Facts : बापरे! या सापाकडे पाहणंही खतरनाक, माणूस होतो आंधळा; पण कसा?

सर्वात धोकादायक प्राण्यांमध्ये सापाचाही समावेश होता. <a href="https://news18marathi.com/tag/snake-news/">साप दंश करतात त्यानंतर त्यांचं विष शरीरात पसरतं आणि मग मृत्यू होतो</a>. पण एक साप असा आहे, जो दंशातून नाही तर थुंकीतून आपलं विष सोडतो. तो इतका डेंजर आहे की तुमच्यापासून 9 फूट अंतर दूर असेल आणि त्याने विष थुंकलं तर ते डोळ्यात जाऊन तुम्ही आंधळे होऊ शकता. हा साप कोणता असा प्रश्न तुम्हालाही पडला असेल.

झेब्रा स्पिटिंग कोब्रा असं या सापाचं नाव आहे. याचं डोकं काळे किंवा तपकिरी असतं, त्याचा मानेकडील भागही काळा असतो. त्याच्या पोटावर हलक्या तपकिरी किंवा क्रीम रंगाचे पट्टे असतात. जेव्हा ते लहान असते तेव्हा शरीरावर हलके तपकिरी किंवा काळे आणि पांढरे पट्टे दिसतात. जसजसे ते मोठे होतात तसतसा त्यांचा रंग गडद होत जातो.

दिसायला तो झेब्रासारखा पट्टेदार दिसतो, म्हणून त्याला झेब्रा स्पिटिंग कोब्रा असं नाव देण्यात आलं आहे या कोब्राचा आकार 3.9 फूट ते 4.9 फूट किंवा त्याहून अधिक असतो. डोळे गोलाकार असतात आणि डोक्याच्या दोन्ही बाजूंना फुगवटा असतो, जिथं तो विष साठवतो.

झेब्रा स्पिटिंग कोब्रा 9 फूट अंतरावरून विष थुंकतो. त्याच्या शरीरातील विष इतकं खतरनाक आहे, की ते तुमच्या डोळ्यांपर्यंत पोहोचलं तर क्षणात आंधळं करू शकतं. सर्वात महत्वाची गोष्ट म्हणजे तो फक्त डोळ्यात बघून थुंकतो. चावल्यानेही त्याचे विष एखाद्याच्या शरीरात पसरू शकते.

आता हा साप आढळतो कुठे तर नामिबिया, अंगोला आणि दक्षिण आफ्रिकेच्या जंगलात हा साप आढळतो. आफ्रिकन जंगलात ते रात्रीच्या वेळी रस्ता ओलांडताना दिसतात. त्याचं आयुष्य 12 वर्षांपर्यंत आहे. साधारणपणे लहान पक्षी, मासे आणि बेडूक खाऊन तो आपलं पोट भरतो. जेव्हा त्याला धोका वाटतो तेव्हाच तो आपला फणा पसरवतो. धोका जाणवताच तो लगेच विष फेकतो. तो झोपेत असतानाही हल्ला करू शकतो.