Flight Facts : विमानात फक्त 100 मिलीच पाणी नेण्याचा नियम का? जास्त नेलं तर काय होईल?

जगातील कोणत्याही विमानतळावर जा, पाणी किंवा कोणतंही द्रव 100 मिलीपेक्षा जास्त नेण्याची परवानगी नाही. यामागे नेमकं कारण काय? याचा तुम्ही कधी विचार केला आहे का? याबाबत तुम्हाला काही माहिती आहे का?

याचं उत्तर 19 वर्षांपूर्वी 2006 मध्ये लंडनच्या हीथ्रो विमानतळावर झालेल्या दहशतवादी घटनेशी जोडलेलं आहे. 2006 मध्ये ब्रिटिश एअरवेजच्या विमानात प्रवास करणाऱ्या काही प्रवाशांनी विमानतळ सुरक्षा तपासणीपूर्वी त्यांच्या बॅगमध्ये पाण्याच्या बाटल्या ठेवल्या होत्या.

सुरक्षा अधिकाऱ्यांनी या बाटल्या तपासल्या तेव्हा त्यांना आढळलं की त्यामध्ये काहीतरी विचित्र आहे आणि त्यामध्ये संशयास्पद पदार्थ असू शकतो. सुरक्षा अधिकाऱ्यांनी याची चौकशी केली आणि त्यांना आढळलं की काही बाटल्या प्रत्यक्षात स्फोटकांनी भरलेल्या होत्या, ज्या पाण्याच्या बाटल्यांच्या पॅकिंगमध्ये लपवल्या गेल्या होत्या.

हे प्रकरण दहशतवादी कटाचा एक भाग होते ज्यामध्ये काही दहशतवादी गट पाण्याच्या बाटल्या आणि इतर सामान्य वस्तूंद्वारे विमानतळाच्या आत स्फोटकं तस्करी करण्याचा प्रयत्न करत होते. सुदैवाने सुरक्षा तपासणी दरम्यान या बाटल्या ओळखल्या गेल्या आणि हे कट उधळून लावण्यात आले.

आंतरराष्ट्रीय नागरी विमान वाहतूक संघटनेने या घटनेची खूप गांभीर्याने दखल घेतली. भविष्यात अशी घटना पुन्हा घडू नये म्हणून, विमानात फक्त 100 मिली पर्यंत द्रव वाहून नेण्याची परवानगी देण्याचा नियम करण्यात आला.

यानंतर जगभरातील विमानतळांवरील सुरक्षा तपासणी प्रक्रियेत कठोर बदल करण्यात आले, ज्यामध्ये 100 मिली पेक्षा जास्त वजनाचे द्रव पदार्थ नेण्यास परवानगी देऊ नये असा नियम समाविष्ट होता. आंतरराष्ट्रीय नागरी विमान वाहतूक संघटनेने बनवलेला हा नियम जगातील सर्व विमानतळांनी लागू केला.

जरी प्रवाशाने सीलबंद पॅक बाटलीत पाणी सोबत आणलं तरी जास्त द्रव सुरक्षा तपासणीनंतर चेक-इन बॅगेजमध्ये ठेवण्याचा नियमही करण्यात आला.