TRENDING:
अवघ्या 23 व्या वर्षी समृद्धीने मिळवलेले हे यश अनेक तरुणांसाठी प्रेरणादायी ठरत आहे. किल्ले नारायणगडाच्या पायथ्याशी वसलेल्या खोडद गावात त्यांचे बालपण गेले. साधे ग्रामीण वातावरण, मर्यादित सुविधा असूनही आपण संरक्षण दलातच जायचे हा निर्धार लहानपणापासून मनाशी पक्का केला होता. बारावीपर्यंतच त्यांनी आपल्या करिअरची दिशा निश्चित केली आणि पुढे इंजिनिअरिंगची पदवी पूर्ण केली. समृद्धीच्या कुटुंबाने त्यांच्या स्वप्नांना नेहमीच भक्कम पाठबळ दिले.
advertisement
आई अरुणा वामन या मुंबई पोलीस दलात कार्यरत असल्याने शिस्त, कर्तव्यनिष्ठा आणि देशसेवेचे संस्कार त्यांना घरातूनच मिळाले. वडील अजित वामन हे एलआयसीमध्ये विमा सल्लागार म्हणून कार्यरत आहेत. आई-वडील, मामा आणि कुटुंबीयांनी प्रत्येक टप्प्यावर समृद्धीला प्रोत्साहन दिले. घरच्यांचा विश्वास आणि पाठिंबा नसता तर हा प्रवास इतका सोपा झाला नसता, असे समृद्धी सांगते. विशेष म्हणजे, वायुदलाच्या परीक्षांसाठी तयारी करताना समृद्धीने आधुनिक तंत्रज्ञानाचा प्रभावी वापर केला.
युट्यूबवरील शैक्षणिक व्हिडिओ, ऑनलाइन मार्गदर्शन सत्रे, मॉक टेस्ट आणि अभ्यास साहित्य यांच्या मदतीने त्यांनी स्वतःची तयारी अधिक भक्कम केली. नोकरी सांभाळत असतानाच टाटा पॉवरमध्ये प्रमुख अभियंता म्हणून कार्यरत होती. तरीही वेळेचे काटेकोर नियोजन करत अभ्यास, शारीरिक तंदुरुस्ती आणि मानसिक दृढतेवर विशेष भर दिला. काही वर्षांपूर्वी प्रदर्शित झालेल्या 'गुंजन सक्सेना: द कारगिल गर्ल' चित्रपटामुळे मुलींमध्ये वायुदलाबद्दल निर्माण झालेला उत्साह नक्कीच प्रेरणादायी ठरला.
मात्र, त्यामागे बालपणापासून मनात असलेली देशसेवेची ओढ अधिक महत्त्वाची होती. मुली कुठल्याही क्षेत्रात कमी नाहीत. योग्य संधी, मार्गदर्शन आणि स्वतःवरचा विश्वास असेल तर कोणतेही स्वप्न पूर्ण होऊ शकते, असे समृद्धी आत्मविश्वासाने सांगते. समृद्धी वामन यांची ही गगनभरारी केवळ वैयक्तिक यश नसून, संपूर्ण जुन्नर तालुक्यासाठी आणि ग्रामीण महाराष्ट्रातील असंख्य तरुणींसाठी प्रेरणादायी ठरणारी आहे.