दहशतवादी हल्ल्याची दाखवली भीती; ज्येष्ठाची 20 लाखांची फसवणूक, पुण्यातील अजब घटना

पोलिसांनी दिलेल्या माहितीनुसार, पाषाण भागात राहणाऱ्या तक्रारदार ज्येष्ठ नागरिकांशी सायबर चोरट्यांनी व्हिडिओ कॉलद्वारे संपर्क साधला. यावेळी चोरट्यांनी पोलिसांसारखा गणवेश परिधान केला होता. त्यांनी ज्येष्ठ नागरिकाच्या बँक खात्याचा वापर दहशतवादी संघटनांना पैसे पुरवण्यासाठी आणि मनी लाँड्रिंगसाठी झाला आहे, असे सांगून त्यांना तात्काळ अटक करण्याची भीती दाखवली. अटकेपासून वाचायचे असल्यास, तातडीने दुसऱ्या खात्यात पैसे जमा करा, असे सांगून चोरट्यांनी १८ ते २१ नोव्हेंबर या कालावधीत वेळोवेळी त्यांच्या बँक खात्यात २० लाख ६५ हजार रुपये जमा करण्यास भाग पाडले. फसवणूक झाल्याचे लक्षात येताच ज्येष्ठ नागरिकानी पोलिसांकडे धाव घेतली. पोलीस निरीक्षक ननावरे या प्रकरणाचा पुढील तपास करत आहेत.

advertisement

Cyber Fraud: बनावट कोर्ट अन् बोगस सीबीआय, निवृत्त अधिकाऱ्याला डिजिटल अरेस्ट, नाशिकमध्ये खळबळ

शेअर बाजारात गुंतवणुकीचे आमिष

एकीकडे दहशतवादाची भीती दाखवून फसवणूक होत असतानाच, दुसरीकडे शेअर बाजारात आकर्षक परताव्याचे आमिष दाखवून सायबर चोरट्यांनी रेंजहिल्स, खडकी येथील एका व्यक्तीची २७ लाख ४१ हजार रुपयांची फसवणूक केल्याचा प्रकार उघडकीस आला आहे. याप्रकरणी खडकी पोलीस ठाण्यात गुन्हा दाखल करण्यात आला आहे. चोरट्यांनी फिर्यादी व्यक्तीला त्यांच्या मोबाइलवर संपर्क साधून शेअर मार्केटमध्ये गुंतवणूक केल्यास चांगला परतावा मिळेल, असे स्वप्न दाखवले. त्यांच्या आमिषाला बळी पडून फिर्यादीने वेळोवेळी चोरट्यांच्या खात्यात मोठी रक्कम जमा केली. मात्र, त्यांना कोणताही परतावा मिळाला नाही. आपली फसवणूक झाल्याचे लक्षात आल्यानंतर त्यांनी पोलिसांकडे तक्रार दिली. वरिष्ठ पोलिस निरीक्षक विक्रमसिंग कदम पुढील तपास करत आहेत.