TRENDING:
आयुक्तांनी केली 23 स्थानकांची प्रत्यक्ष पाहणी
पीएमआरडीएचे आयुक्त डॉ. अभिजित चौधरी यांनी नुकताच माण ते शिवाजीनगर मेट्रो प्रकल्पाचा सविस्तर आढावा घेण्यासाठी प्रत्यक्ष ग्राउंड पाहणी केली. औंध येथे झालेल्या बैठकीनंतर त्यांनी संपूर्ण 23.2 किलोमीटर लांबीच्या मार्गिकेवरील 23 स्थानकांची तपासणी केली. यावेळी मुख्य अभियंता रिनाज पठाण आणि पीआयटीसीएमआरएलचे कार्यकारी अधिकारी अनिलकुमार सैनी सुद्धा उपस्थित होते.
advertisement
कामाचा वेग वाढवताना गुणवत्ता आणि सुरक्षा याबाबत कोणतीही तडजोड करू नये, अशी स्पष्ट सूचना कंत्राटदारांना देण्यात आल्या आहेत. सध्या या प्रकल्पाचे सुमारे 94.20 टक्के काम पूर्ण झाले असून, सिग्नलिंगच्या तांत्रिक चाचण्या सुरू आहेत. तसेच, आरडीएसओ आणि सीएमआरएसच्या तपासण्या देखील पूर्ण झाल्या आहेत.
काय आहेत प्रकल्पाची वैशिष्ट्ये?
हिंजवडी ते शिवाजीनगर मेट्रो प्रकल्प देशातील पहिली मेट्रो आहे, जी सार्वजनिक-खासगी भागीदारी तत्त्वावर राबवली जात आहे. 23.2 किलोमीटर लांबीच्या उन्नत मार्गिकेतून जाणारा हा प्रकल्प टीआरआयएल (टाटा समूह) आणि सीमेन्स प्रोजेक्ट व्हेंचर्स या भागीदारांच्या सहकार्याने राबवला जात आहे. एकूण खर्च सुमारे 8,313 कोटी रुपये असून, हा प्रकल्प पुण्यातील सार्वजनिक वाहतूक व्यवस्थेत महत्त्वपूर्ण बदल घडवून आणणार आहे.
पीएमआरडीएचे आयुक्त डॉ. अभिजित चौधरी यांनी सांगितले की मे 2026 पर्यंत 12 स्थानकांचा पहिला टप्पा सुरू करण्याचे आमचे लक्ष्य आहे. सर्व स्थानकांची प्रत्यक्ष पाहणी करून कामाला गती देण्याचे निर्देश देण्यात आले आहेत. प्रकल्पासाठी पीएमआरडीएकडून आवश्यक ते सर्व सहकार्य दिले जाईल.