13 ऑगस्टला सचिन तेंडुलकरच्या मुलाचा साखरपुडा झाला असला तरी सचिन तेंडुलकर याच्यासाठी 14 ऑगस्ट या तारखेचं आयुष्यात सर्वात मोठं स्थान आहे. आंतरराष्ट्रीय क्रिकेटमध्ये शतकांचं शतक करण्याचा सचिनचा प्रवास 14 ऑगस्टपासूनच सुरू झाला होता. सचिन तेंडुलकरने त्याचं पहिलं शतक वयाच्या 17व्या वर्षी इंग्लंडविरुद्ध केलं होतं. सचिनने हे शतक जेव्हा झळकावलं तेव्हा टीम इंडिया ओल्ड ट्रॅफर्डच्या मैदानात पराभवाच्या दारात होती. सचिनच्या शतकामुळेच टीम इंडियाला हा सामना ड्रॉ करण्यात यश आलं.
advertisement
सचिन तेंडुलकरची टेस्ट क्रिकेटमधली पहिली शतकी खेळी 119 रनची होती. 1990 साली टीम इंडिया मोहम्मद अझरुद्दीनच्या नेतृत्वात इंग्लंड दौऱ्यावर गेली होती. सीरिजच्या दुसऱ्या टेस्ट मॅचमध्ये इंग्लंडने भारताला विजयासाठी 408 रनचं आव्हान दिलं. याचा पाठलाग करताना टीम इंडियाने 183 रनवरच 6 विकेट गमावल्या होत्या, पण एका बाजूने सचिनने किल्ला लढवला. 189 बॉलमध्ये सचिनने 119 रनची खेळी केली.
सचिन तेंडुलकरला दुसऱ्या बाजूने मनोज प्रभाकरची साथ मिळाली. प्रभाकरने 67 रनची नाबाद खेळी केली. तर सचिन 119 रनवर नाबाद राहिला. सचिन आणि प्रभाकरने शेवटच्या दिवशी अडीच तास इंग्लंडला विकेट मिळवून दिली नाही आणि मॅच ड्रॉ केली. दिवसाचा खेळ संपला तेव्हा भारताचा स्कोअर 343/6 एवढा होता.
सचिन तेंडुलकरने जेव्हा हे शतक ठोकलं तेव्हा त्याचं वय 17 वर्ष आणि 112 दिवस होतं. याचसोबत सचिन टेस्ट मॅचमध्ये सगळ्यात लहान वयात शतक ठोकणारा भारतीय खेळाडू बनला. वयाच्या 17व्या वर्षी सचिनने दाखवलेलं धैर्य आणि तंत्रामुळे त्याला प्लेअर ऑफ द मॅच देऊन गौरवण्यात आलं.
1989 साली पाकिस्तानविरुद्ध पहिली टेस्ट खेळणाऱ्या सचिनने जेव्हा आंतरराष्ट्रीय क्रिकेटमधून निवृत्ती घेतली तेव्हा त्याच्या नावावर आंतरराष्ट्रीय क्रिकेटमध्ये 100 शतकं होती. सचिनच्या नावावर 200 टेस्टमध्ये 51 शतकं आणि 15,921 रन होत्या. जगातल्या कोणत्याही क्रिकेटपटूला टेस्ट क्रिकेटमध्ये 50 शतकं करता आलेली नाहीत. याशिवाय सचिनने 463 वनडे सामन्यांमध्ये 49 शतकांच्या मदतीने 18,426 रन केल्या. वनडे क्रिकेटमध्ये सर्वाधिक रनचा विक्रम अजूनही सचिनच्या नावावर आहे. तर वनडे क्रिकेटमध्ये सर्वाधिक शतकांचा सचिनचा विक्रम विराट कोहलीने मोडला. विराटच्या नावावर वनडे क्रिकेटमध्ये 51 शतकं आहेत.