Ashadi Ekadashi 2025: आषाढी एकादशीला आज पंढरपुरात नेमकं काय-काय करतात, असा रंगतो संपूर्ण सोहळा

पंढरपूर (सोलापूर) : वारकरी गेल्या कित्येक दिवसांपासून ज्या क्षणाची वाट पाहत होते, तो दिवस आज उजाडला. आज आषाढी एकादशीला पंढरपूरमध्ये एक अभूतपूर्व आणि भक्तीमय वातावरण पाहायला मिळत आहे. आषाढी एकादशी हा पंढरपूर वारीचा मुख्य दिवस असतो. महाराष्ट्राच्या कानाकोपऱ्यातून लाखो वारकरी अनेक दिवसांपासून पायी चालत पंढरपूरमध्ये दाखल झालेले असतात. संत ज्ञानेश्वर महाराज, संत तुकाराम महाराज, संत एकनाथ महाराज, संत निवृत्तीनाथ महाराज, संत मुक्ताबाई, संत गजानन महाराज अशा अनेक संतांच्या पालख्या आणि दिंड्या या दिवशी पंढरपूरमध्ये पोहोचतात. हा सोहळा भक्ती, उत्साह आणि एकतेचे प्रतीक आहे. वारकऱ्यांचा उत्साह, पांडुरंगाची भेट हे सगळं वातावरण अवर्णनीय असतं.