सगळ्या Car-SUV झाल्या कमी, मग Mercedes घ्यायची का? कंपनीने सांगितली खरी किंमत!

GST च्या नवीन दरांमुळे मर्सिडीजच्या गाड्यांच्या किमती ६-८% पर्यंत कमी होतील. मर्सिडीज-बेंझ इंडिया लवकरच त्यांच्या सर्व गाड्यांसाठी नवीन किंमत यादी जाहीर करणार आहे.   हे पाऊल सरकारच्या 'डिकार्बोनायझेशन पॉलिसी' नुसार आहे. आता फक्त दोन श्रेणी असतील: EV किंवा ICE (Internal Combustion Engine). याचा अर्थ हायब्रीड्सना वेगळ्या श्रेणीत ठेवण्याची गुंतागुंत आता संपली आहे, अशी प्रतिक्रिया मर्सिडीज कंपनीकडून देण्यात आली आहे.

या बदलामुळे डीलर्ससमोर एक मोठं आव्हान उभं राहिलं आहे. त्यांच्याकडे असलेला जुना स्टॉक जास्त कर दराने खरेदी केलेला आहे. यामुळे त्यांना जवळपास २५०० कोटी रुपयांचे नुकसान होऊ शकतं. अर्थ मंत्रालयाने ही समस्या मान्य केली असून लवकरच यावर तोडगा काढण्याची अपेक्षा आहे.

मर्सिडीज-बेंझचा अंदाज आहे की, येणारा सणासुदीचा काळ त्यांच्यासाठी आतापर्यंतचा सर्वात चांगला ठरेल. ऑगस्टमध्ये असलेली मागणी, किमतीतील घट आणि ग्राहकांची वाढलेली खरेदी क्षमता यामुळे विक्री नवीन उंची गाठू शकते. मात्र, युरो-रुपया विनिमय दराची कमजोरी भविष्यात अडचणी निर्माण करू शकते. आयात केलेल्या भागांवर याचा थेट परिणाम होईल. याचा अर्थ, सध्या किमती घटतील, पण जर हीच स्थिती राहिली तर येणाऱ्या महिन्यांमध्ये पुन्हा किमती वाढू शकतात.