Toyota ची धाकड MPV, 23 किमी मायलेज अन् सेफ्टीमध्ये टँकसारखी दणकट, किंमत किती?

नियमित गाड्यांची तुलना केल्यास टोयोटा या कंपनीची असलेली इनोव्हा हायक्रॉस या गाडीला तीन बाबी अधिकच्या पाहायला मिळतात. त्यामध्ये पॉवर युनिट, मोटार जनरेटर आणि 200 व्होल्टेजची हायब्रीड बॅटरी आहे. ही बॅटरी इंजिनला जोडली गेली असल्यामुळे या बॅटरीला चार्जिंग करायची आवश्यकता भासत नाही. ज्याप्रमाणे गाडीचा वेग कमी असेल तसेच जिथे पॉवर पिकअप कमी असणार तिथे बॅटरी चार्जिंग होण्याचे प्रमाण वाढणार आहे. जास्त पॉवर पिकअपची आवश्यकता असल्यास ज्या वेळेला गाडीचा वेग वाढेल त्या वेळेला आपोआप गाडी इंजिनवर होईल, असे टोयोटा वाहन विक्री प्रतिनिधी आकाश जाधव यांनी लोकल 18 शी बोलताना सांगितले.

शहरातील वाहतूक, कमी वेग किंवा ट्रॅफिकमध्ये ही कार अनेक वेळा पूर्णपणे इलेक्ट्रिक मोडवर चालते. ब्रेक मारताना किंवा वेग कमी करताना निर्माण होणारी ऊर्जा बॅटरी चार्ज करण्यासाठी वापरली जाते. यालाच सेल्फ चार्जिंग प्रणाली म्हणतात. त्यामुळे या गाडीला वेगळे चार्जिंग करण्याची गरज लागत नाही आणि इंधनाचीही मोठ्या प्रमाणात बचत होते.