Board Exam : आता बोर्डाचे पेपर AI तपासणार; योग्य उत्तराला असे दिले जाणार मार्क!

मुंबई : आजकाल जवळपास सर्वच क्षेत्रात आर्टिफिशियल इंटिलिजन्स अर्थात 'एआय' हे अद्ययावत तंत्रज्ञान वापरलं जात आहे. कंटेंट तयार करणं असो किंवा फोटो तयार करणं, सगळी कामे एआयच्या मदतीनं केली जात आहेत. आता तर विद्यार्थ्यांच्या परीक्षेचे उत्तरपत्रिका एआय टेक्नॉलॉजी वापरून तपासण्यात येणार आहेत. हरियाणा बोर्ड एआयच्या मदतीनं शिक्षण क्षेत्रात नवीन उपक्रम राबवणार आहे. पुढील वर्षापासून म्हणजेच 2025 पासून एआयच्या मदतीने बोर्ड परीक्षांच्या उत्तरपत्रिका तपासल्या जाणार आहेत. जर सर्व काही नियोजनानुसार झाले, तर या वेळी हरियाणा बोर्डाच्या परीक्षेच्या निकालाला उशीर होणार नाही. विशेष म्हणजे देशात प्रथमच एआयच्या माध्यमातून मूल्यमापन प्रणाली बोर्डामार्फत राबविण्यात येणार आहे. त्यामुळे मार्चमध्ये होणाऱ्या बोर्डाच्या परीक्षांच्या मार्किंगबरोबरच निकालही वेळेत जाहीर होण्यास मदत होईल. शिवाय उत्तरपत्रिका तपासताना चुका होण्याचा धोकाही कमी होईल, असा दावा केला जातोय.