राजर्षी शाहू महाराज परदेशी शिष्यवृत्ती योजनेचा असा घ्या लाभ, 12 जुलै रोजी अर्ज भरण्याची अंतिम मुदत

कोल्हापूर : परदेशात शिक्षणासाठी जायचे असेल तर मध्यमवर्गीय कुटुंबातील मुलांना एकतर एखादी स्कॉलरशिप मिळवावी लागते किंवा एखाद्याही योजनेच्या माध्यमातून ते शक्य करता येऊ शकते. अशीच राजर्षी शाहू परदेशी शिष्यवृत्ती ही योजना सध्या अनुसूचित जातीच्या मुला-मुलींसाठी उपयुक्त ठरत आहे. तर यंदा 2024-25 या शैक्षणिक वर्षात प्रवेश घेतलेल्या विद्यार्थ्यांना या योजनेसाठी अर्ज करण्यासाठी अगदी काहीच दिवसांचा कालावधी राहिलेला आहे.

अनुसूचित जातीच्या मुला-मुलींना परदेशात शिक्षण घ्यायची संधी मिळावी, यासाठी शासनाकडून बरेच प्रयत्न केले जातात. त्यातच सामाजिक न्याय आणि विशेष साहाय्य विभागामार्फत तर्फे राजर्षी शाहू महाराज परदेशी शिष्यवृत्ती योजना राबवली जाते. महाराष्ट्रातील अनुसूचित जाती, नवबौद्ध प्रवर्गातील विद्यार्थ्यांना परदेशात शिक्षणासाठी ही राजर्षी शाहू महाराज शिष्यवृत्ती दिली जाते. 2003 पासून सुरू असणाऱ्या या योजनेद्वारे पदव्युत्तर पदवी, पदव्युत्तर पदविका (पीजी डिप्लोमा ), त्याचबरोबर PhD चे शिक्षण घेण्याकरिता ही शिष्यवृत्ती दिली जाते. महाराष्ट्रातील 75 विद्यार्थ्यांना ही परदेशात शिक्षणासाठी शिष्यवृत्तीची संधी मिळत असते.

दरम्यान या शिष्यवृत्ती बाबतच्या अधिक माहितीसाठी विद्यार्थ्यांनी www.maharashtra.gov.in या संकेतस्थळावर मिळू शकते. तसेच लवकरात लवकर यासाठी इच्छुक विद्यार्थ्यांनी अर्ज करावेत, असे आवाहन समाज कल्याण विभागाकडून करण्यात आले आहे.