Career in Marathi: मराठी भाषेत देखील होऊ शकतं करियर, तुम्हाला माहितीये का या संधी?

ठाणे: आपल्या मुलांनी जागतिकीकरणाच्या स्पर्धेत वाऱ्याच्या वेगात धावायला हवं, सर्वात पुढे असायला हवं अशी प्रत्येक पालकाची इच्छा असते. त्यासाठी हल्ली मुलांना अक्षरओळखही इंग्रजी भाषेतून करून दिली जाते आणि घरातही इंग्रजीचाच सर्रास वापर केला जातो. त्यामुळे मराठी असूनही मराठीशी आपले नाते आता तुटत चालले आहे. कारण मराठी भाषा ही भविष्यात आपल्याला उदर्निवाहाला पुरेशी ठरणार नाही, त्याऐवजी इंग्रजी आणि इतर विषयांच्या वाटा निवडल्या तर आपले करियर चांगले घडेल असा एक गैरसमज लोकांच्या मनात रूढ झाला आहे. पण खरेच असे आहे का? हेही पडताळून पाहणे गरजेचे आहे. म्हणूनच मराठी भाषेत करियरच्या संधी नाहीत, की आहेत? हा प्रश्न प्रत्येकाला पडायला हवा. कारण याचे उत्तर आहे.. हो.. ‘मराठी’ मध्ये करियरच्या प्रचंड संधी आहेत पण आपण त्याकडे दुर्लक्ष करतो.

आजच्या जागतिकीकरणाच्या युगात, मराठी भाषेची महत्त्वपूर्णता आणि स्थान कधीही कमी झालेलं नाही. मराठी भाषेचा उपयोग केवळ महाराष्ट्रातच नाही, तर संपूर्ण भारतात आणि विदेशातही वाढत आहे. त्यामुळे मराठी भाषा शिकून अनेक रोजगाराच्या संधी उपलब्ध होऊ शकतात. विशेषत: मीडिया, शिक्षण, व्यवसाय, ग्राहक सेवा आणि सरकारच्या विविध खात्यांमध्ये मराठी भाषेची मागणी मोठ्या प्रमाणावर आहे. विविध सरकारी आणि खाजगी क्षेत्रातील नोकऱ्यांमध्ये मराठी भाषेची प्रावीण्य असलेल्या व्यक्तीला अनेक नोकऱ्यांसाठी प्राधान्य दिलं जातं. याविषयीची अधिक माहिती भाषाभ्यासक कौशिक लेले यांनी लोकल18 सोबत बोलताना दिलीये.