दारूची झिंग चढली अन् पेटला वाद, दोघांनी मित्रावर झाडल्या 3 गोळ्या, भरदुपारी 'त्या' शेतात नेमकं काय घडलं? 

राहुल नवथर (वय-31, रा. गळनिंब, ता. गंगापूर) असे मृताचे नाव आहे. पोलीस तपासात समोर आलेल्या माहितीनुसार, राहुल नवथर सोमवारी दुपारी त्याचे मित्र कानिफनाथ मावस आणि योगेश कल्याण नागे (दोघेही रा. भिवधानोरा) यांच्यासोबत गट क्रमांक 306 मधील शेतात दारू पिण्यासाठी बसला होता. दारूच्या नशेत त्यांच्यात वाद झाला. हा वाद इतका विकोपाला गेला की, मावस आणि नागे यांनी राहुलवर गावठी कट्ट्यातून सलग तीन गोळ्या झाडल्या.

एक गोळी राहुलच्या डाव्या बरगडीत, दुसरी खांद्यावर आणि तिसरी पोटात लागल्याने त्याचा जागीच मृत्यू झाला. मृतदेह तिथेच सोडून दोन्ही आरोपी फरार झाले. त्यानंतर मंगळवारी रात्री पोलीस, ठसे तज्ज्ञ आणि श्वानपथक घटनास्थळी दाखल झाले.

मृताचा भाऊ महेश नवथर यांनी दिलेल्या फिर्यादीनुसार, कानिफनाथ मावसने राहुलला गोळ्या घातल्या आणि योगेश नागेने त्याला मदत केली. या दोघांविरुद्ध खुनाचा गुन्हा दाखल करण्यात आला आहे. दारूच्या नशेत नेमक्या कोणत्या कारणावरून वाद झाला हे स्पष्ट झाले नसले, तरी वर्चस्वाच्या वादातून ही घटना घडल्याची चर्चा सुरू आहे.