बीडच्या कारागृहात चाललंय काय? गांजावरून वाद पेटला, खोक्या भोसलेची पोलिसांना शिवीगाळ

बीड जिल्हा कारागृहातील बॅरेक नंबर चारमध्ये असलेल्या चार कैद्यांमध्ये गांजा वाटून घेण्यावरुन वाद झाला. हा वाद ऐकून तिकडे गेलेल्या कर्मचाऱ्यांना कैद्यांनी शिवीगाळ केल्याचा धक्कादायक प्रकार घडला आहे. गांजा वरून झालेला वाद सोडवण्यासाठी गेलेल्या पोलिसांना शिवीगाळ देत कैदी अंगावर धावून गेले. तसेच बाहेर सुटल्यावर तुला बघून घेतो अशी धमकी दिल्याची घटना शनिवारी सकाळी घडली. गंभीर बाब म्हणजे यात खोक्या भोसलेचा देखील समोवश आहे.

खोक्या भोसले हा चार गुन्ह्यांमध्ये सध्या कारागृहात असून त्याच्यासह कारागृहात असलेल्या शाम पवार, वसीम पठाण, यमराज राठोड या तिघांमध्ये हा वाद झाला. आता या प्रकरणात बीडच्या शिवाजीनगर पोलिस ठाण्यात गुन्हा दाखल करण्यात आला असून अधिक तपास पीएसआय मोरे हे करत आहेत.

बीड जिल्हा कारागृहात यापूर्वी देखील गांजा, मोबाईल फोन आढळून आला होता. आता तर गांजा वाटून घेण्यावरुन कैद्यांमध्ये वाद आणि कर्मचाऱ्याला धमकी देण्याचा प्रकार घडल्याने कारागृह प्रशासनाचा ढिसाळ कारभार समोर आला आहे.

सतीश भोसले हा शिरूर कासार तालुक्यातील झापेवाडी येथील रहिवासी आहे. मागील पाच वर्षांपासून तो राजकारात सक्रिय असून भाजपच्या महाराष्ट्र भटके विमुक्त आघाडीचे पद त्याच्याकडे आहे. सतीश भोसलेने सामाजिक कार्यातून तसेच पारधी समाजासाठी केलेल्या कार्यातून ओळख निर्माण केली. सतीश भोसले वर गंभीर गुन्हे दाखल असल्याची माहिती समोर आली आहे.खोक्याने अलिकडच्या काळात सुरेश धस यांच्याशी संपर्क आल्याने जवळीक वाढली. सुरेश धस यांच्या कार्यकर्ता असल्याची ओळख निर्माण झाल्याने परिसरात दबदबा निर्माण झाला. मात्र, खोक्याला आता स्टंटबाजीमुळे जेलची हवा खावी लागत आहे.