पुन्हा तेच घडलं! मृत महिलेच्या गळ्यातील चोरलं मंगळसूत्र, नातेवाईक म्हणतात, "जिल्हा रुग्णालय आहे की..."

सुमन जगन्नाथ घिगे (वय-62, रा. सोनगाव) यांना सोमवारी दुपारी छातीत कळ आल्यामुळे जिल्हा रुग्णालयात दाखल करण्यात आले होते. त्यांची प्रकृती चिंताजनक असल्यामुळे त्यांना आयसीयूमध्ये ठेवण्यात आले होते. त्यांच्यासोबत त्यांचे पती जगन्नाथ शिंदे होते. दुर्दैवाने, मंगळवारी पहाटे सुमन यांचा मृत्यू झाला. याच वेळी त्यांच्या गळ्यातील मंगळसूत्र गायब झाल्याचे त्यांच्या नातेवाईकांच्या लक्षात आले.

यापूर्वीही जिल्हा रुग्णालयात अशाच प्रकारच्या घटना घडल्या आहेत. प्रसूती झालेल्या मातेच्या गळ्यातील मंगळसूत्र आणि मोबाईल चोरीला गेल्याची घटना घडली होती. त्यावेळी रुग्णालयाच्या अधिकाऱ्यांनी चोराला पकडून पोलिसांच्या ताब्यात दिले होते आणि बीड शहर पोलीस ठाण्यात त्याची नोंदही झाली होती. तसेच, मृतदेहांच्या अंगावरील दागिने चोरीला गेल्याच्या तक्रारीही यापूर्वी आल्या होत्या, पण त्यांचा तपास लागला नाही. आता पुन्हा एकदा अशाच प्रकारची घटना घडल्याने प्रशासनाच्या निष्क्रियतेवर जोरदार टीका होत आहे.