हात-पाय बांधलेले, कपडे फाटलेले... चिपळूणात निवृत्त शिक्षिकेची निर्घृण हत्या; सीसीटीव्हीचा डीव्हीआर गायब!

वर्षा जोशी या त्यांच्या मैत्रिणींसोबत हैदराबाद येथे फिरायला जाणार होत्या. त्यांची मैत्रीण त्यांना वारंवार फोन करत होती, मात्र त्या फोन उचलत नव्हत्या. त्यामुळे मैत्रीण काळजीत पडली आणि तिने वर्षा यांच्या शेजाऱ्यांना फोन करून चौकशी करण्यास सांगितले. शेजाऱ्यांनी दरवाजा उघडून पाहिले असता, त्यांना घरात वर्षा जोशी यांचा मृतदेह आढळला. त्यांचे हातपाय घट्ट बांधलेले होते. या धक्कादायक प्रकारानंतर तात्काळ पोलिसांना माहिती देण्यात आली.

वर्षा जोशी या सेवानिवृत्त शिक्षिका होत्या. त्यांचे पतीचे निधन अकरा वर्षांपूर्वी झाले होते आणि त्यांना कोणतेही आपत्य नव्हते. त्यामुळे त्या घरात एकट्याच राहत असत. काल (गुरुवारी 7 ऑगस्टला) त्या मैत्रिणींसोबत फिरायला जाऊन काही आनंदाचे क्षण घालवणार होत्या, पण त्याआधीच काळाने त्यांच्यावर घाला घातला. पोलीस सध्या आरोपींचा शोध घेत असून, खून कोणी आणि कशासाठी केला, याचा तपास करत आहेत.