सायबर भामट्यांचा नवा डाव! ED आणि CBI अधिकारी बनून सांगलीतील दोघांना 37 लाखांचा चुना, कशी केली फसवणूक?

व्यावसायिक लक्ष्मण कुलकर्णी यांना 31 ऑगस्ट रोजी एका अनोळखी क्रमांकावरून फोन आला. 'तुमचा मोबाईल नंबर बंद होईल, अधिक माहितीसाठी 9 दाबा', अशी सूचना आल्याने त्यांनी ती दाबून संपर्क साधला. पलीकडून बोलणाऱ्या व्यक्तीने आपण 'अंमलबजावणी विभागातून' (Enforcement Directorate - ED) बोलत असल्याचे सांगितले.

अशीच दुसरी घटना नोकरदार मंगेश पंडित यांच्यासोबत घडली. त्यांना 'सीबीआय'मधून बोलत असल्याचे सांगून शिवप्रसाद आणि सिमी मॅडम या नावाने फोन आला. ‘तुमचे आधार कार्ड दिल्लीतील 'ह्यूमन ट्रॅफिकिंग केस'मध्ये सापडले आहे. तुमच्या आधार कार्डचा वापर करून 3 कोटी रुपयांचा व्यवहार झाला आहे आणि त्याचे कमिशन म्हणून तुम्हाला 30 लाख रुपये मिळाले आहेत’, असे सांगून त्यांना धमकावण्यात आले. या चौकशीसाठी अटक टाळायची असल्यास 10 लाख रुपये भरावे लागतील, असे सांगण्यात आले. पंडित यांनी पैसे भरले, पण 24 तासांत रक्कम परत मिळाली नाही. या दोन्ही घटनांमध्ये नागरिकांनी तात्काळ पोलिसांत धाव घेतली असून, विश्रामबाग पोलीस या सायबर फसवणुकीचा तपास करत आहेत.