...म्हणे मी ईडीमध्ये अधिकारी, सोशल मीडियावरील प्रियकराकडून तरुणीची मोठी फसवणूक, लग्नाआधी समोर आलं हे सत्य

कोलकाता : सध्या देशात प्रत्येकाला आता ईडी हे नाव माहिती झाले आहे. यामुळे याचा अनेकदा दुरुपयोगही होऊन जातो. याबाबत अशीच एक धक्कादायक घटना समोर आली आहे. ही कहाणी पश्चिम बंगालच्या एका तरुणाची आहे. तो स्वत:ला ईडी अधिकारी असल्याचे सांगून सोशल मीडियावर मुलींशी मैत्री करतो. तसेच त्याची नोकरी पाहून मुलीचे कुटुंबीयही लग्नासाठी तयार होऊन जातात. लग्नाची तयारी सुरू होते. लग्नाची तारीखही ठरवली जाते. नातेवाईकांना आमंत्रणही पाठवण्यासाठी पत्रिकाही छापल्या जातात. पण, दरम्यान, मुलीच्या भावाला काहीतरी संशय येतो आणि तो कथित अधिकाऱ्याची चौकशी करण्याचा निर्णय घेतो.

एखाद्या चित्रपटाच्या कथेसारखी ही घटना कोलकात्या बिधानगर येथे घडली. बनावट ईडी अधिकाऱ्याचे नाव प्रदीप साहा असे आहे. तो सोनारपूर येथील रहिवासी आहे. तो ईडी अधिकारी असल्याचे भासवून लोकांची फसवणूक करायचा. सॉल्ट लेक सीजीओ कॉम्प्लेक्सच्या बाहेर याबाबत गदारोळ झाला. मुलीच्या कुटुंबीयांनी आरोपीला सॉल्ट लेक येथील सीजीओ कॉम्प्लेक्समध्ये हात बांधून आणि गळ्यात बनावट ईडी ओळखपत्र लटकवून आणले.

याबाबत मुलीच्या भावाने सांगितले की, प्रदीप नुकताच ईडी कार्यालयात 10 मिनिटांसाठी आला होता. त्यानंतर त्याला संशय आल्याने तो (प्रदीप) निघून गेल्यावर त्याने कार्यालयात जाऊन चौकशी केली असता धक्कादायक माहिती समोर आली. यावेळी तिथे तैनात असलेल्या CISF जवानांना मुलीच्या भावाने या बनावट ईडी अधिकाऱ्याचा फोटो दाखवला. तेव्हा त्यांनी सांगितले की या नावाचा आणि चेहरा असलेला कोणीही येथे काम करत नाही, यानंतर हा खुलासा झाला. या घटनेची परिसरात जोरदार चर्चा होत आहे.