SBI ला गंडवलं! खोटं सोनं तारण ठेवून 7 लाखांचं घेतलं कर्ज, 10 वर्षांनी कळली फसवणूक; सराफांनी केली होती मदत!

पोलिसांनी दिलेल्या माहितीनुसार, 25 मे 2015 ते 16 मे 2025 या दहा वर्षांच्या कालावधीत राजेंद्र यादव यांनी एसबीआयच्या पलूस शाखेतून सोने तारण कर्ज घेतले होते. कर्ज प्रक्रियेदरम्यान, तारण ठेवण्यात आलेले सोने खरे आहे की नाही, याची खातरजमा राजेंद्रकुमार शिंदे आणि सुधाकर सूर्यवंशी या स्थानिक सराफांनी केली होती. या सराफांनी संबंधित सोने खरे असल्याचे बँकेला भासवून चुकीची माहिती दिली. त्यांच्या या चुकीच्या माहितीवर विश्वास ठेवून बँकेने अंदाजे 204.13 ग्रॅम सोने तारण म्हणून स्वीकारले आणि त्यावर 7 लाख 60 हजार रुपयांचे कर्ज मंजूर केले.

मात्र, काही दिवसांनी बँकेच्या अधिकाऱ्यांना या सोन्याबाबत संशय आला. त्यांनी तातडीने सोन्याची कसून तपासणी केली. या तपासणीअंती संबंधित सोने बनावट असल्याचे निष्पन्न झाले. या प्रकरणामुळे बँकेची मोठी फसवणूक झाल्याचे उघडकीस आले असून, प्राथमिक तपासानुसार संबंधित व्यक्तींनी संगनमत करून बँकेची आर्थिक फसवणूक केल्याचे स्पष्ट झाले आहे.