405 दिवस, 10 देश, 41 लाखांचा खर्च... ध्येयापर्यंत पोहोचला, पण शेवटी नशीब फुटकं निघालं अन् स्वप्न भंगलं...

हो, ही कहाणी आहे 20 वर्षीय मनिंदर पाल सिंगची, जो जालंधर (पंजाब) मधील पट्टी मालशियनमध्ये राहतो. मनिंदर पाल सिंगचंही अमेरिकेत जाऊन नवीन आयुष्य सुरू करण्याचं स्वप्न होतं. आपलं स्वप्न पूर्ण करण्यासाठी मनिंदरने ऑक्टोबर 2023 मध्ये प्रवास सुरू केला. सर्वप्रथम तो दिल्लीहून कझाकिस्तानला पोहोचला. कझाकिस्तानमध्ये काही दिवस राहिल्यानंतर तो दुबईला निघाला.

दुबईहून त्याला लिबियाला पाठवण्यात आलं आणि नंतर लिबियाहून तो सेनेगलला पोहोचला. यानंतर, तो लिबिया, निकाराग्वा, होंडुरास, ग्वाटेमाला मार्गे मेक्सिकोला पोहोचण्यात यशस्वी झाला. मनिंदरला या देशांच्या सीमा ओलांडण्यासाठी सुमारे 13 महिने लागले. ऑक्टोबर 2023 मध्ये सुरू झालेला मनिंदरचा अमेरिकेचा प्रवास नोव्हेंबर 2024 मध्ये मेक्सिकोमार्गे अमेरिकेत पोहोचून संपला.

अमेरिकेत पोहोचताच मनिंदरने त्याच्या एजंटच्या सूचनेनुसार, विविध देशांचे बनावट व्हिसा असलेले पासपोर्टचे सर्व पानं फाडून टाकली. यानंतर, मनिंदरचं दुर्दैव त्याला अमेरिकेच्या सुरक्षा एजन्सींकडे घेऊन गेलं. त्यानंतर, अमेरिकेच्या सुरक्षा एजन्सीने मनिंदरला अटक करून डिटेंशन सेंटरमध्ये पाठवलं. सुमारे दोन महिने डिटेंशन सेंटरमध्ये ठेवल्यानंतर त्याला दिल्लीच्या आयजीआय विमानतळावर परत पाठवण्यात आलं.

आयजीआय विमानतळाच्या डीसीपी उषा रंगनानी यांच्या म्हणण्यानुसार, अमेरिकेतून परत पाठवण्यात आलेला आरोपी मनिंदर पाल सिंगला भारतीय दंड संहितेच्या कलम 318(4)/319(2)/336(3)/340(2)/238(C) आणि पासपोर्ट कायद्याच्या कलम 12 अंतर्गत अटक करण्यात आली आहे. या प्रकरणाचा तपास करण्यासाठी एसएचओ सुनील गोयल यांच्या नेतृत्वाखाली एक टीम तयार करण्यात आली. मनिंदरने दिलेल्या माहितीवरून अमित अरोरा नावाच्या आणखी एका आरोपीला पंजाबमधून अटक करण्यात आली आहे.