Ratnagiri Crime News : भाऊबंदकीचं नातं रक्ताने माखलं, थोरल्या भावाने धाकट्याला वार करत संपवलं, दापोली हादरलं!

दापोली: एका लहानशा वादातून सख्खा भाऊ पक्का वैरी झाला. थोरल्या भावाने धाकट्या भावाला वादाच्या रागातून संपवल्याची घटना समोर आली आहे. रत्नागिरी जिल्ह्यातील दापोली तालुक्यातील उन्हवरे गावात शनिवारी मध्यरात्री ही धक्कादायक घटना घडली. एका मोठ्या भावाने थेट आपल्या लहान भावाचा कुऱ्हाडीने प्राणघातक हल्ला करत हत्या झाल्याने संपूर्ण गाव हादरून गेलं आहे. या कुटुंबातील दोन भावांचा वाद इतका चिघळला की त्याचा शेवट एकाची हत्या आणि दुसऱ्याची रवानगी तुरुंगात झाली आहे. तर, आपल्या डोळ्यादेखत कुटुंब उद्धवस्त झाल्याचे दिसल्याने वृद्ध आईसमोर थरथरता हात कपाळाला लावण्याशिवाय पर्यायच राहिला नाही.