Bigg Boss Marathi 6 : सगळ्यांना सोलते ती तन्वी कोलते 'बिग बॉस मराठी 6' सोडणार, स्वत:च घराबाहेर पडण्याचा निर्णय; कारण काय?

बिग बॉस मराठीच्या सहाव्या सीझनमध्ये 2 एव्हिक्शन झाले. तिसऱ्या आठवड्यापर्यंत दोन सदस्य घराबाहेर पडले. पहिली राधिका पाटील आणि दुसरी सोनाली राऊत. एव्हिकेशन आठवड्याच्या शेवटी होतं. पण आता चौथ्या आठवड्यात आठवड्याच्या सुरुवातीलाच तन्वी कोलतेने आपल्याला शो करायचा नाही, घराबाहेर पडायचं आहे, असं म्हटलं आहे. तिने स्वत:च घराबाहेर पडण्याचा निर्णय घेतला आहे. 'डोळ्यांनी बोलते, सगळ्यांना सोलते तन्वी कोलते', असं सागर कारंडे तन्वीबाबत बोलतो. पण आता हीच तन्वी बिग बॉस शो का सोडणार असल्याचं नव्या प्रोमोत दिसून आलं आहे.

बिग बॉसच्या नव्या एपिसोडच्या प्रोमो समोर आला आहे. ज्यात तन्वी आपल्याला हा शो करायचा नाही, आपल्याला शो सोडायचं आहे, असं बोलताना दिसते. याचं कारणही या प्रोमोत आहे. व्हिडीओत तुम्ही पाहू शकता बिग बॉसच्या घरात पुन्हा चोरी झाली आहे. विशाल आणि रोशनला चोरी झालेलं सामान सापडतं. यात चॉकलेट, तांदूळ अशा वस्तू आहेत. यावेळी चोरीचा आरोप लावण्यात आला तो तन्वीवर. कारण सामान तिच्या बेडजवळ सापडतं.

तन्वी ओरडून ओरडून सांगते ही आपण चोरी केली नाही. पण कुणीच तिच्यावर विश्वास ठेवत नाही. घरातील सगळे सदस्य तन्वीवर तुटून पडतात.  तन्वीला हे सगळं सहन होत होत नाही. ती रडू लागते, वैतागते आणि आपल्याला हा शो करायचा नसल्याचं ती सांगते. तसंच ती तिथून निघून जातानाही दिसते. तिच्या मागोमाग दिपाली सय्यद तिला अडवायला येते, पण तन्वी दिपालीचं ऐकत नाही, ती काही काही थांबत नाही.

दरम्यान तन्वीच्या चाहत्यांनी ती असं करणार नाही, असं म्हणत आपण तुझ्या पाठिशी आहोत असं म्हटलं आहे. बहुतेकांनी अनुश्रीच चोर असणार असं म्हटलं आहे. काहींनी तन्वीला तिच्या रडण्यावरून ट्रोल केलं आहे. याआधीही ती बऱ्याचदा रडताना दिसली आहे. त्यामुळे हा प्रोमो पाहिल्यानंतर प्रेक्षकांनी या रडकीला आधी घराबाहेर काढा, खरंच तू घराबाहेर पड आमचा तुम्हाला पाठिंबा आहे, असं खोचकपणे म्हटलं आहे.

तन्वीने आपल्याला शो करायचं नाही, बिग बॉसच्या घरातून बाहेर पडायचं आहे, असा स्वत:चा निर्णय तर जाहीर केला. पण खरंच तिला असं मधेच घरातून बाहेर पडता येईल का? बिग बॉस तिला घरातून बाहेर जाऊ देतील का? हे आता येत्या एपिसोडमध्येच पाहायला मिळेल. पण तन्वी घराबाहेर जायला हवी? खरा चोर कोण असेल? तुम्हाला काय वाटतं? आम्हाला आमच्या सोशल मीडियाच्या कमेंट बॉक्समध्ये नक्की सांगा.