Zakir Khan: आधी स्टँडअप कॉमेडितून ब्रेक, आता थेट रुग्णालयात ॲडमिट! झाकीर खानला नक्की झालंय तरी काय? भावाने दिली हेल्थ अपडेट

झाकीर सध्या मुंबईतील लीलावती रुग्णालयात झाकीर उपचार घेत आहे. पण असे असतानाही, त्याचा नेहमीचाच बिनधास्त अंदाज दिसून आला. झाकीरचा भाऊ अरबाज खानने सोशल मीडियावर एक व्हिडीओ शेअर केला, ज्यामध्ये झाकीर लीलावती रुग्णालयातील बेडवर आराम करत असल्याचे दिसून आले. पण विशेष म्हणजे, आजारी असतानाही झाकीर टी२० च्या भारत विरुद्ध न्यूझीलंड फायनल सामन्याचा आनंद घेताना दिसला. हॉस्पिटलमधील एका प्रशस्त खोलीमध्ये तो आपले कुटुंबीय आणि मित्रपरिवारासह मॅच पाहण्यात मग्न होता. भावाने त्याला तब्येतीबद्दल विचारणा करताच झाकीर हसून म्हणाला, "तब्येतीचं सोड, सध्या मॅच फसली आहे!" या वाक्यावरून त्याने पुन्हा एकदा सिद्ध केलं की परिस्थिती कोणतीही असो, तो आपला कूल अंदाज सोडत नाही.

झाकीरच्या तब्येतीची काळजी त्याच्या फॅन्सबरोबरच अनेक दिग्गज लोकांनाही आहे. आयपीएस मनोज कुमार शर्मा आणि त्यांच्या पत्नी आयआरएस श्रद्धा जोशी यांनीही रुग्णालयात जाऊन झाकीरची भेट घेतली. पण झाकीरला नेमकं झालंय काय, याबाबत अद्याप कोणतीही माहिती समोर आलेली नाही.

गेल्या महिन्यात हैदराबादमधील आपल्या 'पापा यार' टूरदरम्यान झाकीरने एक धक्कादायक घोषणा केली होती. त्याने सांगितलं होतं की, २०२६ ते २०२८ किंवा कदाचित २०३० पर्यंत तो लाईव्ह कॉमेडी शो करणार नाही. एका दुर्मिळ अनुवंशिक आजारामुळे त्याने हा निर्णय घेतल्याचं बोललं जात होतं. त्यावेळी त्याने आपली तब्येत ठणठणीत असल्याचा दावा केला होता, पण आता अचानक तो रुग्णालयात दाखल झाल्याने अफवांना पुन्हा उधाण आलं आहे.

झाकीर खानने स्वतः स्पष्ट केलं होतं की, त्याला कोणताही गंभीर किंवा जीवघेणा आजार झालेला नाही. मात्र, शरीर आणि मनाला विश्रांती देण्यासाठी आणि आपल्या आरोग्यावर लक्ष केंद्रित करण्यासाठी त्याने हा निर्णय घेतला आहे. सततच्या ट्रॅव्हलिंगमुळे आणि कामाच्या व्यापामुळे प्रकृतीवर परिणाम होऊ नये, हा त्याचा त्यामागचा हेतू आहे.