'गाफिल राहू नका', गुजराती अभिनेत्रीचा राज ठाकरेंना अप्रत्यक्ष पाठिंबा? अस्खलित मराठी भाषेत शेअर केला जळजळीत VIDEO

जिगना त्रिवेदीने आपल्या व्हिडिओमध्ये मुंबईच्या सद्यस्थितीवर अत्यंत मार्मिक भाष्य केलं आहे. ती म्हणते, "आज मुंबईचा विकास होतोय असं म्हटलं जातं, पण या विकासाच्या नावाखाली मुंबईकरांचा श्वास मात्र गुदमरतोय. रस्ते, ट्रॅफिक आणि वाढती गर्दी यामुळे मुंबईचा मूळ चेहरा हरवत चाललाय." जिगनाने यावेळी मुंबईतील वाढत्या स्थलांतराच्या मुद्द्यावरही बोट ठेवलं. मुंबई विकसित आहे म्हणून जगभरातून लोक इथे येतात, पण आता वेळ आली आहे की, जे भाग अजूनही अविकसित आहेत तिथे लक्ष दिलं जावं, जेणेकरून मुंबईवरचा ताण कमी होईल.

जिगनाचे अनेक गुजराती नाटकं आणि सिनेमे गाजले आहेत, पण मुंबईबद्दलचं तिचं प्रेम या व्हिडिओतून स्पष्टपणे दिसून आलं. राज ठाकरेंचं नाव थेट न घेता तिने त्यांच्या व्हिजनला पाठिंबा दिला. "महाराष्ट्र खऱ्या अर्थाने एका 'राजा'च्या हातात असायला हवा, ज्याच्याकडे या शहराला वाचवण्याची दृष्टी आहे," असं म्हणत तिने मुंबईकरांना मतदानासाठी बाहेर पडण्याचं आवाहन केलं. मुंबईला वाचवायचं असेल, तर योग्य उमेदवाराला निवडून देणं ही आपली जबाबदारी असल्याचं तिने ठणकावून सांगितलं.

उद्या, १५ जानेवारीला सकाळी ७.३० वाजल्यापासून मतदानाला सुरुवात होणार आहे. मुंबईत यंदाची निवडणूक ऐतिहासिक आहे, कारण राजकीय समीकरणं पूर्णपणे बदलली आहेत. अशातच जिगनासारख्या सेलिब्रिटींनी उघडपणे आपली मतं मांडल्यामुळे मतदारांमध्ये, विशेषतः तरुण वर्गात एक वेगळीच चर्चा सुरू झाली आहे.