'मी स्वतःसाठीच खेळणार', नॉमिनेशन टास्कमध्ये दिसले रुचिताचे खरे रंग, टोळीमध्ये भूकंप! विशालला मोठा धक्का, VIDEO

नॉमिनेशन प्रक्रियेपूर्वीच घरामध्ये एक मोठा ट्विस्ट पाहायला मिळाला. गेल्या आठवड्यात मिळालेली 'पॉवर की' प्राजक्ता शुक्रेला महाद्वारात जमा करायची होती, पण प्रभूने ती आधीच चोरल्यामुळे प्राजक्ता रिकाम्या हाताने उभी होती. नियमानुसार, ती चावी प्रभूने जमा केली आणि प्राजक्ताला मिळणारी एम्युनिटी प्रभूला मिळाली. यामुळे कॅप्टन तन्वी, चावी असलेली अनुश्री आणि चावी चोरणारा प्रभू हे तिघे या आठवड्यात सेफ' झाले आहेत.

आजच्या नॉमिनेशन टास्कमध्ये सदस्यांच्या गळ्यात एकमेकांचे फोटो अडकवण्यात आले आहेत. यातला सर्वात मोठा ड्रामा घडला तो रुचिता, दिपाली आणि राकेश यांच्यात. रुचिताच्या गळ्यात राकेशचा फोटो आहे, तर दिपालीच्या गळ्यात रुचिताचा फोटो आहे.

रुचिताला राकेशला नॉमिनेट करायचं होतं, पण तिने तसं केलं नाही. याचं साधं कारण म्हणजे, जर रुचिताने राकेशला वाचवलं, तर दिपाली रुचिताला वाचवणार होती. ही डील पाहून विशाल, सागर आणि प्राजक्ता यांचा पारा चढला. विशालने तिला जाब विचारला असता रुचिताने ठणकावून सांगितलं, "मला आता टोळी-काटा ग्रुपशी काहीच देणंघेणं नाही. या क्षणाला मी फक्त स्वतःसाठी खेळणार." रुचिताचा हा पवित्रा पाहून तिला 'शब्दाची पक्की नाही' असे टोमणेही मिळाले.

यावेळचा नॉमिनेशन टास्क अतिशय गुंतागुंतीचा आहे, कारण स्पर्धकांचं भविष्य दुसऱ्याच्या हातात आहे. सागरच्या गळ्यात आहे दिपालीचा फोटो, राकेशकडे रोशनचा फोटो, रुचिताकडे राकेशचा फोटो, दिपालीकडे रुचिताचा फोटो, विशालकडे सागरचा फोटो, प्राजक्ताकडे विशालचा फोटो, राखीकडे प्राजक्ताचा फोटो आणि रोशनकडे राखीचा फोटो आहे.