'मी घरातही सुरक्षित नाही...' सलमानची EX घाबरली, मागितला बंदुकीचा परवाना

जुलै महिन्यात घडलेल्या या घटनेत काही अज्ञात लोकांनी तिच्या फार्महाऊसमध्ये प्रवेश करून मोठी हानी केली होती. त्यांनी रेफ्रिजरेटर, टीव्ही, फर्निचर यासारख्या वस्तू फोडल्या आणि घरातील भिंतींवर अश्लील चित्रे काढली. इतकंच नव्हे तर 50,000 रोख आणि 7000 किमतीचा टीव्हीही चोरला गेला. या घटनेमुळे अभिनेत्री हादरली होती. फार्महाऊसभोवती लावलेले सीसीटीव्ही कॅमेरेही तोडले गेल्याने ही कृती पूर्वनियोजित असल्याचा संशय व्यक्त केला जात आहे.

संगीता बिजलानीने पोलिसांकडे या प्रकरणाची तक्रार दाखल केली होती. मात्र, घटनेनंतर जवळपास तीन महिने उलटूनही आरोपींचा शोध लागलेला नाही. अभिनेत्री म्हणाली, "मी गेल्या 20 वर्षांपासून या फार्महाऊसमध्ये राहत आहे, पण आता मला माझ्याच घरात सुरक्षित वाटत नाही."

अलीकडेच तिने पुणे ग्रामीण पोलिस अधीक्षक संदीप सिंग गिल यांची भेट घेतली आणि प्रकरणाच्या तपासात गती आणण्याची मागणी केली. तिचा बंदुकीच्या परवान्यासाठी अर्ज सध्या प्रक्रियेत आहे. या घटनेनंतर अनेक चाहत्यांनी आणि सेलिब्रिटींनी सोशल मीडियावर तिच्याबद्दल सहानुभूती आणि समर्थन व्यक्त केले आहे. संगीता सध्या मुंबईत असून, ती पुन्हा फार्महाऊसमध्ये जाण्यापूर्वी सुरक्षा व्यवस्थेत बदल करण्याचा विचार करत आहे.