लतादीदींचा जबरा फॅन, घरात उभारलं चक्क मंदिर अन् लग्नात...Video

राजीव देशमुख यांना वयाच्या तेराव्या वर्षापासून लतादीदींच्या गाण्यांचा छंद लागला. लतादीदींच्या गाण्यांचं देशमुख यांना इतकं वेड आहे की त्यांच्या घराच्या भिंतीवर दीदींचे अनेक फोटो लावले आहेत. त्यांच्यासोबतच्या भेटीचा प्रसंग दर्शवणारा एक फोटो लावला आहे. एवढंच नाही तर स्वतःच्या लग्नाच्या पत्रिकेत देखील गानसम्राज्ञी लता मंगेशकर यांचा फोटो लवायलाही ते विसरले नाहीत.

राजीव यांच्या आयुष्यातला एक किस्सा असा आहे की ते अवघ्या 7 व्या वर्गात असताना शाळेतूनच दीदींना मुबई येथे भेटण्यासाठी निघाले होते. मात्र, आरपीएफ जवानांनी सातव्या वर्गातील देशमुख यांना एकटा बघून थेट घरी आणून सोडलं होतं. तरीही लतादीदींना भेटण्याची इच्छा काही कमी झाली नाही. पुन्हा 12 वीला असताना 1982 मध्ये एकटेच मुंबईत दीदींना भेटण्यासाठी गेले. तेव्हा दीदी या परदेशी गेल्या होत्या. त्यामुळे तेव्हाही भेट झाली नाही. त्यानंतर 1987 साली पुणे येथे एका कॉन्सर्ट मध्ये लता दीदींना भेटण्याची संधी मिळालीच. तेव्हा त्यांना जग जिंकल्यासारखं वाटलं. तो फोटोही देशमुख यांनी अगदी जपून ठेवलाय.

राजीव देशमुख यांच्या पत्नी शुभांगी देखमुख यांनी लतादीदींचे सरस्वती देवीच्या रुपात पोस्टर तयार केले आहे. घरात येणाऱ्या प्रत्येकाचे लक्ष वेधून घेईल असे हे पोस्टर आहे. लता दीदी या आमच्यासाठी देवाप्रमाणे आहेत. तसेच तो आवाज पुन्हा होणे शक्य नाही. त्यामुळे स्वर देवतेचा आवाज असणाऱ्या लतादीदींना सरस्वती देवीच्या रूपात पोस्टरच्या माध्यमातून सादर केले आहे, असे शुभांगी सांगतात.