Google Googly 01: 'गुगल'ला आधी काय म्हणायचे? 'बॅकरब'शी काय कनेक्शन, एका 'टायपो'मुळे घडला इतिहास

गुगलने सुरुवातीला 'बॅकरब' (Backrub) या नावाने आपला प्रवास सुरू केला होता. विशेष म्हणजे गुगल हे नाव 'गूगोल' (Googol) या शब्दाचे स्पेलिंगमधील एक चुकीचे रूपांतरण (टायपो) आहे. 'गूगोल' ही एक गणितीय संकल्पना आहे. ज्यामुळे 'एकावर 100 शून्य' (one with a hundred zeros) दर्शविले जातात. कंपनीच्या माहितीनुसार हे नाव कंपनीच्या मोठ्या दृष्टिकोनाला समर्पित आहे. गुगलचे ध्येय जगातील सर्व माहिती सर्वांसाठी उपलब्ध करणे हे आहे आणि हे नाव त्याच ध्येयाचे प्रतीक आहे.

1996 मध्ये स्टॅनफोर्ड विद्यापीठातील (Stanford University) लॅरी पेज (Larry Page) आणि सर्जी ब्रिन (Sergey Brin) या दोन पदवी विद्यार्थ्यांनी 'बॅकरब' नावाचे सर्च इंजिन (search engine) तयार केले. या सर्च इंजिनचे नाव 'बॅकरब' ठेवण्याचे कारण ते वेबसाइट्सच्या 'बॅकलिंक्स'चे (backlinks) विश्लेषण करून सर्च रिजल्ट्स दाखवत होते. बॅकलिंक्स म्हणजे इतर वेबसाइट्सने दिलेले संदर्भ होय.

1997 मध्ये कंपनीचे नाव अधिकृतपणे 'गुगल' असे ठेवण्यात आले. 'गूगोल' शब्दाचे स्पेलिंग चुकल्याने 'गुगल' हे नाव तयार झाले. परंतु हेच नाव आज जगभर प्रसिद्ध आहे. गुगलने केवळ सर्च इंजिनमध्येच नव्हे तर अनेक प्रकारच्या सेवांमध्ये आपले वर्चस्व प्रस्थापित केले आहे. गुगल आज जगातील सर्वात मोठ्या आणि प्रभावशाली कंपन्यांपैकी एक आहे. गुगलमुळे जगातील माहिती आता आपल्या सर्वांच्या बोटांवर उपलब्ध आहे. जे कंपनीच्या नावाच्या अर्थाला पूर्णपणे न्याय देते.