Kalyan : मलंगगडावर आता 'उडता' प्रवास! 2 तासांची जीवघेणी चढण अवघ्या 7 मिनिटांत पार; भाविकांसाठी मोठी सोय

ठाणे जिल्ह्यातील मलंगगड हे हिंदू आणि मुस्लिम भाविकांचे एक प्रसिद्ध धार्मिक स्थळ आहे. सह्याद्रीच्या डोंगररांगेत वसलेल्या या गडावर जाण्यासाठी आतापर्यंत भाविकांना कठीण अशी दोन तासांची चढण चढावी लागत होती. ज्येष्ठ नागरिक, महिला आणि लहान मुलांसाठी हा प्रवास अतिशय त्रासदायक ठरत होता. ही अडचण लक्षात घेऊन अंबरनाथचे तत्कालीन आमदार किसन कथोरे यांनी स्वित्झर्लंडच्या धर्तीवर मलंगगडावर फ्युनिक्युलर रेल्वे सुरू करण्याचा प्रस्ताव मांडला होता.

सार्वजनिक बांधकाम विभागाने सप्तशृंगी वणीगड आणि मलंगगड या दोन्ही ठिकाणी फ्युनिक्युलर रेल्वे प्रकल्पांना मंजुरी दिल्यानंतर कामाला सुरुवात झाली. वणीगडावरील सेवा सुरू झाली असली तरी मलंगगडाचा प्रकल्प विविध अडथळ्यांमुळे बराच काळ रखडला होता. अखेर सर्व अडचणी दूर झाल्यानंतर मलंगगडावरील फ्युनिक्युलर रेल्वे सेवा सुरू झाली आहे.