Washing Machine : वॉशिंग मशीन वापरताना 'या' चुका टाळा, नाहीतर होऊ शकते फंगस, कपड्यांना येईल वास

आपल्या घरात इलेक्ट्रॉनिक वस्तू असल्या की आपल्याला त्याचं वेळोवेळी सर्व्हिसिंग करून घ्यावं लागतं. प्रत्येक इलेक्ट्रॉनिक वस्तूची काळजी घेणं आवश्यक असतं, त्याचप्रमाणे वॉशिंग मशीनचीही विशेष काळजी घ्यावी लागते, नाहीतर ते खराब होऊ शकतं किंवा आपले कपडे खराब होऊ शकतात. पावसाळ्यात कपडे नीट न सुकल्यास त्यातून दुर्गंधी येते. त्यामुळे पावसाळ्यात वॉशिंग मशिनची योग्य काळजी न घेतल्यास त्यात फंगस लागण्याचा धोका असतो. फंगसबरोबरच अशी परिस्थिती देखील असू शकते ज्यामुळे कपड्यांना वास येऊ लागतो. पावसाळ्यात कपडे धुताना कोणती चूक करायची नाही ते जाणून घेऊयात.

सेमी-ऑटोमॅटिक असो वा ऑटोमॅटिक वॉशिंग मशीन असो, कपडे धुतल्यानंतर प्रत्येकाने एका गोष्टीची खास काळजी घेणं आवश्यक आहे. पावसाळ्यात कपडे धुतल्यानंतर लगेच वॉशिंग मशीनचं झाकण कधीही बंद करू नये. कपडे धुतल्यानंतर मशिनच्या ड्रममध्ये मॉइश्चर राहतं आणि पावसाळ्यात त्याचं प्रमाण खूप जास्त प्रमाणात वाढतं. त्यामुळे वॉशिंग मशिनचे झाकण अचानक बंद केल्यास ड्रममध्ये फंगस तयार होण्याचा धोका असतो आणि दुर्गंधी देखील येऊ लागते. यानंतर जेव्हा तुम्ही त्यात कपडे धुण्यासाठी टाकता तेव्हा कपड्यांमधून वास येण्याची शक्यता असते. त्यामुळे कपडे धुतल्यानंतर झाकण थोडा वेळ उघडं ठेवावं जेणेकरुन थोडी हवा आत जाऊ शकेल आणि ड्रम पूर्णपणे कोरडा होऊ शकेल.