मुंबईचा वडा-पाव वाचवा! पावाला अत्यावश्यक सेवेचा दर्जा द्या; भाजप नगरसेवकाचे थेट फडणवीसांना साकडे

मुंबई:  इराण- इस्त्राईल युद्धामुळे उद्भवलेल्या व्यावसायिक LPG सिलिंडरच्या टंचाईचे चटके आता थेट मुंबईकरांच्या जिव्हाळ्याच्या 'पाव'ला बसण्याची शक्यता निर्माण झाली आहे. मुंबईतील बेकऱ्यांना होणारा गॅस पुरवठा विस्कळीत झाल्याने शहरात पाव आणि ब्रेडचा मोठा तुटवडा निर्माण होऊ शकतो. या गंभीर परिस्थितीची दखल घेत भाजप नगरसेवक मकरंद नार्वेकर यांनी मुख्यमंत्री देवेंद्र फडणवीस आणि महानगरपालिका आयुक्त भूषण गगराणी यांना पत्र लिहून तातडीने हस्तक्षेप करण्याची विनंती केली आहे. एवढच नाही तर नार्वेकर यांनी सरकारला बेकरीसाठी लागणारा इंधनपुरवठा अत्यावश्यक वस्तू म्हणून घोषित करण्याची तसेच लाकूड, कोळसा आणि डिझेलवर चालणाऱ्या ओव्हनचा तात्पुरता वापर करण्यास परवानगी देण्याची मागणी केली आहे.