Success Story: नोकरी सोडली अन् 'JFC' सुरू केलं, नाशिकच्या तरुणाने महिन्याला बक्कळ कमाई

मुजाहिद कादरी यांनी बी. कॉमचे शिक्षण पूर्ण करून पुण्यातल्या एका नामांकित कंपनीत नोकरी मिळवली होती. काही वर्षे सर्व सुरळीत सुरू असताना, अचानक काही कारणांमुळे त्यांना ती नोकरी सोडावी लागली. त्यानंतर दुसऱ्या ठिकाणी नोकरी मिळाली, पण तिथेही त्यांना जास्त काळ थांबता आले नाही. नोकरीतील या अस्थिरतेमुळे त्यांनी आपला मोर्चा आपल्या मूळ गावी, नाशिककडे वळवला. लहानपणापासून स्वयंपाकाची आवड असल्याने, त्यांनी नाशिकमधील एका कॅफेमध्ये 'शेफ'ची नोकरी मिळवली आणि आपले स्वप्न पूर्ण केले. मात्र, याच दरम्यान आलेल्या कोरोना महामारीमुळे त्यांना हा जॉबदेखील सोडावा लागला.

कोरोनानंतर मुजाहिद यांचा नोकरी करण्यातील रस पूर्णपणे मावळला. या रिकाम्या वेळेत त्यांनी स्वत:चा व्यवसाय सुरू करण्याचा निश्चय केला. परंतु, नक्की काय सुरू करावे, हा प्रश्न होता. त्यावेळी त्यांना पुण्यात पाहिलेल्या 'कोल्ड सँडविच'ची कल्पना आठवली. नाशिकमध्ये ही संकल्पना नवी असल्याने, त्यांनी कोल्ड सँडविच विक्रीतून आपल्या व्यवसायाची सुरुवात केली. हळूहळू या क्षेत्रात त्यांना यश मिळू लागले. त्यानंतर त्यांनी नाशिकमधील दूध बाजार परिसरात सँडविच आणि बर्गरचा आपला गाडा लावला.

मुजाहिद कादरी सांगतात, “हा व्यवसाय मी केवळ 5 हजार रुपयांच्या छोट्या भांडवलातून सुरू केला होता. आज याच व्यवसायातून मला नोकरीपेक्षा कितीतरी जास्त पैसा मिळत आहे.” लोकल 18 सोबत बोलताना त्यांनी स्पष्ट केले की, सध्या त्यांची मासिक कमाई सरासरी 60 ते 70 हजार इतकी आहे. कॉर्पोरेटमधील नोकरीच्या असुरक्षिततेतून बाहेर पडून, आपल्या स्वयंपाकाच्या आवडीला व्यवसायात बदलणाऱ्या मुजाहिद कादरी यांचा हा प्रवास अनेक तरुणांसाठी नक्कीच प्रेरणादायी आहे.