Heart Health Risk : जिममध्ये करू नका 'या' 5 चुका; नाहीतर हृदयावर येईन ताण, जीव वाचवणंही होऊ शकतं कठीण!

विशेषतः जिममध्ये चुकीच्या पद्धतीने व्यायाम केल्यास हृदयाशी संबंधित समस्यांचा धोका वेगाने वाढू शकतो. अनेक लोकांना वाटते की, जास्त घाम आला म्हणजे वर्कआउट योग्य झाले, किंवा जितके जास्त जड वजन उचलले तितके चांगले. पण खरं हे आहे की, शरीराची एक मर्यादा असते आणि ती दुर्लक्षित करणे हृदयासाठी धोकादायक ठरू शकते. तुम्हीही जिमला जात असाल किंवा जाण्याचा विचार करत असाल तर फिटनेससोबत तुमचे हृदयाचे आरोग्य सुरक्षित राहावे यासाठी या 5 मोठ्या चुका नक्की जाणून घ्या.

गरजेपेक्षा जास्त व्यायाम करणे : TOI च्या रिपोर्टनुसार अनेक लोक पहिल्याच दिवशी स्वतःला प्रोफेशनल समजू लागतात. हळूहळू तयारी न करता थेट हाय इंटेन्सिटी वर्कआउट सुरू करतात. गरजेपेक्षा जास्त व्यायाम केल्याने हृदयावर अचानक दबाव पडतो. संशोधनानुसार खूप वेगवान आणि जड व्यायाम केल्याने काही काळासाठी हार्ट अटॅकसारख्या गंभीर धोक्यांचा धोका वाढू शकतो. जिम सुरू करण्यापूर्वी 10 ते 15 मिनिटे हलका वॉर्मअप नक्की करा. हळूहळू इंटेन्सिटी वाढवा आणि शरीराचे संकेत समजून घ्या.

विश्रांतीकडे दुर्लक्ष करणे : रोज न थांबता वर्कआउट करणे अनेकांना योग्य वाटते. मात्र शरीराला रिकव्हरीसाठी वेळ देणे खूप आवश्यक आहे. सतत जड ट्रेनिंग आणि कमी विश्रांतीमुळे हार्ट रेट आणि ब्लड प्रेशरवर परिणाम होऊ शकतो. हे तुमचे हृदय जास्त तणावात असल्याचे संकेत असू शकतात. आठवड्यातून किमान एक किंवा दोन दिवस जड व्यायामापासून ब्रेक घ्या. पुरेशी झोप घ्या आणि शरीराला सावरण्यास वेळ द्या.

पाणी आणि इलेक्ट्रोलाइट्सची कमतरता : जिममध्ये घामासोबत शरीरातून पाणी आणि आवश्यक मिनरल्स बाहेर पडतात. इलेक्ट्रोलाइट्स हृदयाच्या योग्य कार्यासाठी खूप महत्त्वाचे असतात. त्यांची कमतरता झाल्यास हृदयावर दबाव वाढू शकतो आणि चक्कर येणे, अशक्तपणा किंवा धडधड वाढणे अशा समस्या निर्माण होऊ शकतात. वर्कआउटच्या आधी, दरम्यान आणि नंतर पाणी पित राहा. सेशन जास्त वेळचे असल्यास मर्यादित प्रमाणात इलेक्ट्रोलाइट ड्रिंकही घेऊ शकता.

चुकीच्या पद्धतीने व्यायाम करणे : चुकीचे पोस्चर किंवा चुकीच्या पद्धतीने वजन उचलणे फक्त मसल्ससाठीच नव्हे, तर हृदयासाठीही नुकसानकारक ठरू शकते. संशोधनात हेही समोर आले आहे की, जड वजन उचलताना श्वास घेण्याची पद्धत ब्लड प्रेशरवर परिणाम करते. सुरुवातीला ट्रेनरची मदत घ्या. योग्य फॉर्म आणि योग्य ब्रीदिंग पॅटर्न शिका. सर्वात महत्त्वाचे म्हणजे जड वजन उचलण्याची योग्य पद्धत माहित नसल्यास ते टाळा.

शरीराच्या चेतावणी संकेतांकडे दुर्लक्ष करणे : ही सर्वात धोकादायक चूक आहे. वर्कआउटदरम्यान छातीत दुखणे, जास्त श्वास लागणे, चक्कर येणे, हृदयाची धडधड अनियमित होणे किंवा खूप जास्त थकवा जाणवणे असेल तर त्याकडे दुर्लक्ष करू नका. असे संकेत अनेकदा गंभीर हृदयविकारांकडे इशारा करतात. तात्काळ वर्कआउट थांबवा आणि गरज भासल्यास डॉक्टरांशी संपर्क साधा. जबरदस्तीने व्यायाम सुरू ठेवू नका.

Disclaimer : या बातमीत दिलेली माहिती आणि सल्ला तज्ञांशी झालेल्या संभाषणांवर आधारित आहे. ही सामान्य माहिती आहे, वैयक्तिक सल्ला नाही. म्हणून कोणत्याही सल्ल्याचे अनुसरण करताना तज्ज्ञांचा सल्ला घ्यावा. कोणतेही नुकसान झाल्यास त्यासाठी न्यूज-18 जबाबदार राहणार नाही.