Pregnancy Tips: बदलत्या जीवनशैलीचा फटका, गर्भावस्थेत ‘हायपरटेन्शन’चा धोका, कशी घ्यावी काळजी?

कोल्हापूर : बदलती जीवनशैली, आहारातील बदल आणि धावपळीचे जीवन यामुळे गर्भवती महिलांमध्ये गर्भावस्थेत गुंतागुंत निर्माण होण्याची भीती वाढत आहे. गेल्या दहा वर्षांपासून गर्भवती महिलांमध्ये उच्च रक्तदाबाची (हायपरटेन्शन) समस्या गंभीर स्वरूप धारण करत आहे. तज्ज्ञांच्या मते, सुमारे 5 टक्के गर्भवती महिलांमध्ये उच्च रक्तदाब आढळून येत असून, यामुळे प्री-एक्लमप्शिया ही गंभीर अवस्था निर्माण होण्याची शक्यता वाढत आहे. यासंदर्भात कोल्हापुरातील डॉ. अविनाश शिंदे यांनी माहिती दिली आहे.

गर्भावस्था हा प्रत्येक महिलेच्या आयुष्यातील सुखद अनुभव असतो. मात्र, बदलत्या जीवनशैलीमुळे या आनंदात अनेक समस्या निर्माण होत आहेत. गर्भवती महिलांमध्ये रक्तदाब वाढणे, हात-पायांना सूज येणे, मूत्रात प्रोटीन जमा होणे, बाळाची वाढ खुंटणे किंवा गर्भात बाळाचा मृत्यू होणे अशा गंभीर समस्या उद्भवू शकतात. यालाच वैद्यकीय भाषेत प्री-एक्लमप्शिया असे म्हणतात.