Sleep : हे वाचून उडेल झोप, जास्त वेळ झोपणं येईल अंगाशी, वाचा सविस्तर

एखादी व्यक्ती दिवसातून नऊ तासांपेक्षा जास्त झोपत असेल तर त्याच्या अचानक किंवा अकाली मृत्यूचा धोका 34 टक्क्यांनी वाढू शकतो. एका संशोधनाद्वारे ही निरीक्षणं नोंदवण्यात आली आहेत. यासाठीचा अभ्यास अमेरिका आणि युरोपमधील आरोग्य संशोधनावर आधारित होता. लाखो नागरिकांच्या झोपेच्या सवयी आणि आरोग्याबद्दलचं विश्लेषण यात करण्यात आलं. यामुळे, त्यांचा मृत्यूचा धोका देखील सामान्य नागरिकांपेक्षा जास्त असल्याचं दिसून आलं.

झोपेचं योग्य प्रमाण किती ?

आरोग्य तज्ज्ञांच्या मते, 18 ते 60 वयोगटातील व्यक्तीसाठी दररोज 7 ते 8 तासांची झोप पुरेशी असते. शरीराची अंतर्गत दुरुस्ती, मेंदूची दुरुस्ती आणि रोगप्रतिकारक शक्ती मजबूत करण्यासाठी हा काळ योग्य मानला जातो.

तर नऊ तासांपेक्षा जास्त झोपलं तर आळस, अशक्तपणा आणि इतर मानसिक आणि शारीरिक समस्या वाढतात.

जास्त झोपेचे तोटे

- चयापचयाचा वेग कमी होतो, ज्यामुळे लठ्ठपणा येऊ शकतो.

- मेंदूचं कार्य कमकुवत होऊ शकतं, ज्यामुळे स्मरणशक्तीवर परिणाम होतो.

- नैराश्य आणि चिंता वाढण्याचा धोका वाढतो.

- हृदयरोग आणि स्ट्रोकसारख्या गंभीर आजारांचा धोका वाढतो.

- शरीरात थकवा आणि कमी ऊर्जा राहते.

हे टाळण्यासाठी काय करावं ?

- रोज नियमित वेळी झोपण्याची आणि उठण्याची सवय लावा.

- झोपण्यापूर्वी मोबाईल किंवा स्क्रीनचा वापर कमी करा.

- रात्री कॅफिन आणि जड पदार्थ खाणं टाळा.

- दिवसभर थकवा जाणवत असेल तर डॉक्टरांचा सल्ला घ्या.

झोप महत्त्वाची आहे पण मर्यादित प्रमाणात. जास्त झोपणं हे कमी झोपण्याइतकंच हानिकारक असू शकतं.

म्हणून, दररोज 7-8 तास चांगली आणि गाढ झोप घेणं चांगलं. नऊ तासांपेक्षा जास्त झोप घेणाऱ्यांमधे अचानक किंवा अकाली मृत्यूचा धोका 34 टक्क्यांनी वाढतो असंही संशोधनातून दिसून आलं आहे.

जास्त झोप टाळा आणि दिनचर्या निरोगी ठेवा.