Obesity Effects : लठ्ठपणाला हलक्यात घेऊ नका, अनेक आजारांना मिळेल निमंत्रण, कमी करण्यासाठी करा हे उपाय

कोल्हापूर : आधुनिक जीवनशैलीच्या वेगवान धावपळीत लठ्ठपणा ही जागतिक स्तरावर एक गंभीर आणि झपाट्याने वाढणारी आरोग्य समस्या बनली आहे. शरीरात अतिरिक्त चरबी जमा झाल्याने व्यक्तीचे वजन सामान्य वजनापेक्षा 20 टक्क्यांहून अधिक वाढते, ज्यामुळे स्थूलपणा उद्भवतो. ही केवळ शारीरिक समस्या नसून, यामुळे अनेक जीवघेणे आजार जडतात, ज्याचा थेट परिणाम व्यक्तीच्या आरोग्यावर आणि आयुर्मानावर होतो. तज्ज्ञांच्या मते, लठ्ठपणा हा एक पॉलीऑर्गन डिसऑर्डर आहे, म्हणजेच एका समस्येमुळे अनेक आजारांना निमंत्रण मिळते. यामुळे उच्च रक्तदाब, हृदयरोग, मधुमेह, फॅटी लिव्हर, स्लीप एपनिया, ऑस्टियोआर्थरायटिस आणि काही प्रकारचे कर्करोग यांसारख्या गंभीर आजारांचा धोका वाढतो. याशिवाय, अकाली मृत्यूचा धोकाही लठ्ठपणामुळे वाढतो, ज्यामुळे ही समस्या तातडीने हाताळण्याची गरज आहे. याविषयीचं कोल्हापुरातील डॉक्टर अविनाश शिंदे यांनी माहिती दिली आहे.