चेहऱ्यावर अगदी चंद्रासारखं तेज येईल, वजनही कमी होईल; उपाय घरातच!

दमोह, 26 डिसेंबर : गोड पदार्थ कितीही आवडत असले तरीही चमचमीत मसालेदार पदार्थ पहिले की कोणाच्याही तोंडाला आपसूक पाणी येतं. जशी जेवणाला फोडणीशिवाय चव नसते, तशीच फोडणी हिंगाशिवाय अपूर्ण असते. त्यामुळे हिंग हा स्वयंपाकघरातला एक महत्त्वाचा पदार्थ आहे.

तुम्हाला माहितीये का, चिमूटभर हिंग जशी अन्नपदार्थांची चव वाढवतं, तसंच ते आरोग्यासाठीदेखील उपयुक्त असतं. आयुर्वेदात हिंगाचे फायदे सांगितलेले आहेत. त्यानुसार, हिंग मोठमोठ्या आजारांवर गुणकारी असतं. त्यामुळे जेवणात हिंगाचा आवर्जून वापर करण्याचा सल्ला दिला जातो. शिवाय हिंगामुळे वजनही नियंत्रणात राहतं, तर वाढलेलं वजन कमी होण्यास मदत मिळते.

आयुर्वेदिक डॉक्टर दीप्ती नामदेव सांगतात की, विशेषतः हिवाळ्यात हिंग सर्वाधिक फायदेशीर ठरतं. झाडाच्या मुळांमधून निघणाऱ्या दुधापासून ते तयार केलं जातं, ज्याचा वापर आपण अन्नपदार्थांची चव वाढवण्यासाठी करतो.