Health Tips : पायांमध्ये सारख्या मुंग्या आणि गोळे येतात? मग शरीरात असू शकते 'या' व्हिटॅमिनची कमतरता

आजकाल अनेकांना पाय सुन्न पडण्याच्या किंवा पायांना गोळे येण्याचा त्रास होतो. याचं कारण म्हणजे शरीरात व्हिटॅमिन बी 12 ची कमतरता आहे. या व्हिटॅमिनची कमतरता शरीरात असेल तर शिरांसबंधित समस्या जाणवतात. याच्या कमतरतेमुळे हात व पायाला मुंग्या येतात, ते सुन्न पडतात. व्हिटॅमिन बी 12 ची कमतरता असल्यास पेरिफेरल व सेंट्रल नर्व्हला नुकसान पोहोचतं.

हात आणि पायांना मुंग्या येणं, जिभेला फोड येणं, हृदयाचे ठोके वाढणं, त्वचेवर पिवळसरपणा येणं, दिसण्यात अडचण येणं ही व्हिटॅमिन बी 12 च्या कमतरतेची मुख्य लक्षणं आहेत. आपल्याला त्रास होत असेल तर एकदा रक्ताची तपासणी केली पाहिजे. या शिवाय व्हिटॅमिन बी12 च्या कमतरतेमुळे स्मरणशक्ती कमी होणं, अशक्तपणा येणं इत्यादी लक्षणंही दिसतात. शरीरात व्हिटॅमिनची कमतरता होणार नाही, यासाठी विशेष काळजी घ्यायला हवी त्यासाठी आहार सुधारायला हवा.